SONA ni Jessica, mobalik na!

CEBU, Philippines — Mobalik na sa telebisyon ang State of the Nation news program sa GMA News TV nga unang gidungog nga manamilit na sa ere.

Kahinumduman nga gikaguol sa mga staff ang chika nga mag-babu na ang naisgutang flasghip news program sa maong estasyon nga gidumala ni Jessica Soho isip anchor.

 Unom ka bulan nga wala sila makita sa telebisyon nunot matud pa sa pandemic nga giatubang pa karon sa nasud. Hangtud nga giingnan sila nga dili lang una sila mo ere.

Apan suma pa sa PEP, nakadawat og back-to-work order ang mga staff niining bag-o lang, ug gitakda na sila nga mobalik pagbalita karong umaabot nga Lunes, September 21.

Janella, mabdos gyud diay?

Mabdos matud pa ang 22-anyos nga si Janella Salvador ug gitakda kining manganak sunod bulan didto sa United Kingdom.

Kini maoy esklusibong balita sa www.pep.ph, diin matud pa, ang 22-anyos nga Star Magic Talent nga si Markus Patterson maoy amahan sa gisabak ni Janella, kinsa unang nisikat sa teleseryeng Be Careful with my Heart kaniadto.

Suma pa sa PEP, nilupad na paingon sa UK ang inahan ni Janella gas i Jenine Desiderio kauban ang manghod sa aktres nga si Russel niadtong September 10.

Dugang taho sa PEP mao nga nasayud na ang mga suod nga higala ni Janella kabahin sa iyang pagsabak.  Ang pananghid matud pa ni Janella mao nga mutungha siya didto sa UK.

Unang nibuto  ang pagduda nga mabdos si Janella human nila angkuna sa nilabay nga semana ang ilang relasyon. Una silang gikataho gilambigit ngadto sa usa'g-usa sugod niadtong Agosto sa nakalabay nga tuig.

Nitumaw ang pagduda sanglit sa Istagram ni Janella, puros lang matud pa dagway sa aktres ang iyang ipakita ug wala gyud whole body photos.

Nisamot ang pagduda nga mabdos gyud kini, dihang sa usa ka deleted video ni Markus sa IG, may tingog sa babaye nga ingon og kang Janella nga nagkanayon nga diriyot matud pa siya nakaambak tungod sa ok-ok, maayo na lang gani kay nakapugong pa siya sanglit gidili matud pa niya ang mag-ambak-ambak.

Si Markus nahimugso ug nagdako didto sa UK, ug nipauli dinhi sa nasud niadtong 2016 sangllit nisalmot kini sa ABS-CBN reality search nga Pinoy Boy Band.