Comeback movie sa LizQuen segurado na

CEBU, Philippines — Subling mag-uban sa pelikula sila si Liza Soberano ug Enrique Gil nga ubos sa Star Cinema. Si Cathy Garcia Molina ang direktor sa maong movie project.

Sugdan na ang shooting niini sa higayon  nga mohinay na ang kaso sa COVID-19.

Katapusang pelikula sa LizQuen mao ang “Alone/Together nga gihuptan ni Direk Antoinette Jadaone.

Nag-uban usab sila sa teleseryeng “Make It With You” apan wala nahuman tungod sa pandemya  ug ang wala pag-renew sa franchise sa ABS-CBN.

Bela nominado pagka-best actress

Mikulit gyud og atensyon sa international scene ang pag-arte ni Bela Padilla sa teleserye kaniadto sa ABS-CBN nga “Sino Ang May Sala”. Nominado siya sa kategoriyang best actress sa 15th Seoul  International Drama Awards

Suma pa nga ang maong teleserye maoy nag-inusarang show gikan sa Pilipinas nga nalakip sa maong drama awards.

Itchyworms dunay bag-ong album

Nagpanikad na ang  Itchyworms  alang sa paglusad sa ilang bag-ong album.

Nag-ulohan kini og  “Waiting for the End to Start" nga magsilbing ikalima nga album sa Itchyworms.

Ang pormal nga paglusad niini mahitabo karong  August 17, 7:30 p.m., sa ilang  Facebook page.

Usa sa mga miyembro sa Itchyworms mao ang  "It's Showtime" host nga si Jugs Jugueta.  Ang maong grupo maoy nagpasikat sa  "Akin Ka Na Lang"ug “Beer".

Positibo sa COVID-19

Gipahibalo sa bokalista sa bandang I Belong To The Zoo nga si  Argee Guerrero nga nagpositibo siya sa COVID-19 .

"Tested positive for mild COVID. Quarantined in my room since July 26,” tweet pa sa singer.

Gitataw hinoun niya nga niarang-arang na ang iyang pamati karon.  "Don't worry, everything is slowly going back to normal,”niya pa.

Gitambagan usab niya ang iyang fans nga magpuyo ra gyud sa balay kun walay importanteng pagabuhaton sa gawas.  "The latest toys, shoes, streetwear, and gadgets can wait. Your old and new hobbies can wait. Stay at home,” dugang pa niya.

Ang I Belong To The Zoo maoy nagpasikat sa awit nga “Sana”. 

Tungod sa kalipay Ivana nag-topless

Isip pagsaulog sa bag-ong milestone sa iyang karera isip vlogger, nag-topless ang Kapamilya star nga si Ivana Alawi. Ang maong hulagway kuha  sa sikat nga celebrity photographer nga si BJ Pascual.

Una na nga nabalita dinhi sa Banat News Hugyaw sa miaging adlaw nga nagmaya si Ivana human nitungtong na og 8 million ang iyang subscribers sa YouTube.

Pribadong love life ang target

Gusto ni Miguel Tanfelix nga makabaton og pribadong love life apan wala niya giklaro kun duna ba siya’y girl friend karon.

Suma pa sa aktor nga seguradong makabaton siya og malinawon  nga love life kun dili kini ipublikar.

Sa pagka-karon, tutokan ni Miguel ang iyang umaabot nga proyekto sa GMA-7.

Nagtapok ang mga lig-on

Duha ka maghigala ang kalit nga mabungkag gumikan sa panagtigi  sa gugma , pamilya, ug katigayonan ug kini ang mahimong dagan sa istorya  sa seryeng “Ang Sa Iyo Ay Akin” nga mosikad  karong Agosto 17 sa Kapamilya Channel ug Kapamilya Online Live.

Ang maong serye pagabitoonan sa mga lig-ong artista  nga naglangkob nila ni Jodi Sta. Maria, Iza Calzado, Sam Milby ug  Diamond Star Maricel Soriano.

Ang "Ang Sa Iyo Ay Akin" kay ubos sa  direksyon nila ni F.M. Reyes ug Avel Sunpongco, ug produksyon naa sa JRB Creative Production.

Suma pa ni Direk FM nga todo gyud ang iyang pag-adjust aron lang gyud maseguro nga mapatuman ang health protocol.

Suma pa niya nga dili puwede ma-execute ang “sampalan” ug love scene busa  duna ra’y magic sa camera nga pagahimoon niini.

“Mahirap siya, kaya may dayaan nalang na mangyayari,” suma pa sa direktor atol sa virtual presscon sa miaging adlaw. 

Elijah : Straight ko!

Nakuryuso ang ubang fans ni Elijah Canlas sa iyang sekswalidad gumikan sa iyang gay role sa Boy Love series nga Gameboys kun diin ka-love team niya ang laing aktor nga si Kokoy de Santos .

Suma pa ni Elijah nga usa siya ka straight guy ug mapasalamaton siya sa mga nakauyon sa iyang pag-arte sa maong BL series.

“Well, straight po ako! Pero I mean…  as a person sobrang open lang po talaga ako, especially as an artist na you know that  there’s no one way to love.And I don’t know what will happen in the future kasi  I’m living in ‘the now’, in the present. So I’m just a very open person and I’m open to loving whoever, whatever, pero straight po ako,” saysay pa niya sa Facebook Live ni Ogie Diaz.

Si Elijah ang napili nga best actor sa 17th Asian Film Festival alang sa pelikula niya nga “Kalel,15”.

Kathryn misurpresa sa fans

Gisurpresa ni Kathryn Bernardo ang iyang fans pinaagi sa pagkontak niini ug iyaha  usab  kini nga gi-prank.

Duna siya’y fans nga nakahilak gyud gumikan kay wala niya damha nga tawagan siya sa iyang idolo.

Mapasalamaton si Kathryn sa iyang fans gumikan sa kalamposan sa iyang vlog nga “Everyday Kath”.