Naghiusa sa pagsuporta sa medical frontliners

CEBU, Philippines — Nipagawas og short video ang mga  miyembro  sa League of Filipino Actors  isip pagpasalamat  ngadto sa medical frontliners.

Gilangkoban kini sa Kapuso ug Kapamilya stars nga sama nila ni Angelica Panganiban, Piolo Pascual, Marian Rivera, Dingdong Dantes , Jodi Sta. Maria, Sunshine Dizon, Anne Curtis, ug Angel Locsin.

Nalakip usab sila si Iza Calzado, Cherry Pie Picache, Agot Isidro, Joel Torre, Angel Aquino, Gabby Eigenmann, Joel Saracho, Angeli Bayani, ug Jackie Lou Blanco.

Pasok pud sa listahan sila si Joem Bascon,  Janine Gutierrez, Kokoy de Santos, Elijah Canlas, Vance Larena, Meryll Soriano, Adrienne Vergara, Kean Cipriano, Chynna Ortaleza,  Mylene Dizon, Gabbi Garcia, Kahlil Ramos, Ria Atayde, John “Sweet” Lapus, Jo Berry ug uban pa.

Dear Momshie Karls ugma na

Mosikad na ugma ang bag-ong online show ni Karla Estrada nga makita sa iyang YouTube channel.

Suma pa ni Karla nga usa kini sa iyang nga gikabisihan karong panahona.

Ang maong show nag-ulohan og  "Dear Momshie Karls" .

“Mapapanood niyo na ang unang episode ng 'Dear Momshie Karls' sa Sabado! Excited na kong makakwentuhan kayo!" suma pa ni Karla . 

Pinoy fan gidayeg ni Taylor

Nakadayeg og maayo ang singer nga si Taylor Swift  ngadto sa iyang Pinoy fan  nga ginganlan og John Paul Cledera  nga nagmugna og cake nga inspired  sa latest album sa singer nga folklore.

Suma pa  ni John Paul nga niabot og duha ka oras ang pagmugna sa maong cake ug gitabangan siya sa iyang igsoun nga si Nicole Anne. Gigama niya kini gumikan sa kalamposan sa album sa iyang idolo.

Naabot kang Taylor ang hulagway sa gimugna nga  cake ug nahimout siya og maayo niini.

“WOW this is incredible! Thank you so much for making this. I also saw your Instagram and your art is phenomenal!,” suma pa sa IG post ni Taylor.

Gipatay sa mga teleserye

Gipatay na ang mga karakter nila ni Christopher de Leon ug Ariel Rivera sa tagsa-tagsa nila nga mga teleserye sa Kapamilya Channel.

Dunay nga pagduda nga posibleng naapektohan ang duha sa kalit nga pag-usab sa mga  sa story line sa mga teleserye karong panahona aron mapatuman ang ubang health protocols sa taping ug usa na niini ang pagminos sa gidaghanon sa tawo.

Si Christopher maoy nidala isip amahan ni Kim Chiu sa Love Thy Woman , samtang si Ariel maoy naghupot  sa karakter ni General

Victor Mondejar sa teleseryeng A Soldier’s Heart .

Balik-LDR

Nibalik na sa Ireland ang boyfriend ni Glaiza de Castro nga si David Rainey.

Suma pa sa aktres nga gimingaw na ang iyang uyab sa pamilya niini. Mag-anad na pud si Glaiza sa sitwasyon nila nga long distance relationship o LDR.

Kahinumdoman nga taod-taod nga nakabakasyon ang iyang boyfriend dinhi sa nasud human naabtan sa lockdown.

Bailey dunay obligasyon sa England

Atol sa iyang 18th birthday kagahapon , malipayong gipahibalo ni  kanhi Pinoy Big Brother" housemate nga si Bailey May  nga opisyal na siya nga ambassador sa  Paradise Wildlife Park.

Usa kini  ka animal  park nga nahimutang sa Broxbourne didto sa Hertfordshire, England.

Kahinumdoman nga nagsugod ang showbiz career ni Bailey niadtong 2015 human kini nisalmot sa PBB.