Regional level HVI sikop sa buy-bust

CEBU, Philippines — Sikop ang 30-anyos nga durugista sa buy-bust operation sa City Intelligence Branch sa Cebu City Police Office nga pinangulohan ni Police Major Randy Caballes alas 2:25 kagahapon sa kaadlawon sa Sitio Tugas, Barangay Mambaling.

Ang dinakpan mao si Juanito Villegas Sabal alyas «Wardok» kinsa gikatahong anaa sa drug watchlist high-value individual-regional level.

Atol sa operation nakuha sa posesyon sa dinakpan ang 115 gramos sa gidudahang shabu nga mobalor og P728,000.

Samtang sikop sab ang upat ka durugista sa mga tinugyanan sa San Nicolas Police Station ug City Drug Enforcement Unit sa CCPO atol sa buy-bust operation sa managlahi nga lugar niadtong Domingo.

Unang nasikop mao si Jade Zafra, 49, taga Barangay Calamba, kinsa nasakmitan og mga pinutos sa ginadili nga drugas ug buy-bust money nga P200.

Nasikop sab sila si Paolo Bantal, 25; Wanito Tuyak, 50, ug Ricardo Abao, kinsa nasakmitan og mga pinakete sa ginadili nga drugas. GMR (BANATNEWS)