Galamay ni Kerwin Espinosa nanglihok?

CEBU, Philippines —  Magpahigayon og re-validation ang Cebu Provincial Police Office (CPPO) kalabot sa taho nga nibalik na sab paglihok ang mga galamay ni self-confessed drug lord Kerwin Espinosa sa Probinsiya sa Sugbo.

Matud pa ni CPPO Director, Police Colonel Rhoderick Mariano, nga sa pagkakron wala pa siyay nadawat nga impormasyon kalabot sa ilegal nga kalihukan sa mga tawo ni Espinosa sa Probinsiya sa Sugbo.

Apan iya pa kini nga paglantawan sa mga operasyon nga gilusad sa mga police stations sa probinsiya.

Hinoon giklaro ni Mariano nga subsob gyud ang kampanya batok sa ilegal nga drugas sa Probinsiya sa Sugbo ilabi na sa kanunay nga mapanganlan ni Presidente Rodrigo Duterte ang Dakbayan sa Talisay.

Kahinumduman nga niadtong nilabay nga semana sa paglingkod sa bag-o nga regional director sa Police Regional Office 7, Police Brigadier General Albert Ferro, nga nakadawat siya og impormasyon kalabot sa paglihok pagbalik sa mga tawo ni Espinosa lakip na sab ang Parojinog Drug Group nga inila sa Dakbayan sa Ozamis.

Makig-alayon sab ang CPPO sa Philippine Drug Enforcement Agency 7 ug Regional Intelligence Division 7. GMR (BANATNEWS)