Dasig lang gyud!

CEBU, Philippines — Pagpaningkamot inubanan sa dakong pagsalig sa kaugalingon  maoy usa sa pamaagi aron maangkon ang butang nga taod taod na nga gitinguha.

Mao kini  ang nahimong kapalaran sa 16 anyos nga si Jehramae Trangia kinsa nahimong grand winner sa Sinulog Idol Season 11 .

Ang makabihag niya nga tingog ug ang lig-on niya nga personalidad mao ang midomar sa karon nga edisyon.

Saysay pa ni  Jehramae ngadto sa Banat News Hugyaw nga dili  sab sayon ang kaagi sa iyang kinabuhi . Nasayran nga kanunay nga  makita sa mga tawo ang iyang pagka-malipayon apan dunay mga parte nga hilom siya nga  nagpas-an og kagul-anan.

“Daghan kaayo ko og ups and downs nga naagian as a teenager. Nakaagi ko nga wala na-appreciate sa mga tawo ang akong talent which is nakaapekto kaayo nako sauna nga maabot na sa point nga mahadlok nako ipakita ang akong talent kay basin og i-underestimate ko”, si Jehramae miingon.

Busa naabot  gyud sa punto nga nakaingon siya nga kinahanglan na gyud ang dakong pagsalig sa kugalingon.

Maingon nga medyo na late na sab siya sa pagpakita sa iyang talento sa kinabag-an kun diin 14 anyos na siya nga nagsugod sa pagsalmot og mga singing contest.

“Naa tuy time nga gipasalmot ko sa among school og contest  then na-shock akong mama nga nakadungog then nakita niya nga naa koy potential  busa iya ko nga gipa-enrol og voice lesson.  Nakaapil dayon ko sa  usa ka amateur singing contest sa E-Mall and luckily na-first runner up ko.  Nindot kaayo sa feeling nga mokanta in front of a lot of people labi na nagtan-aw sad imong mama ug papa.”, si Jehramae miasoy.

Dako gyud og papel sa kinabuhi ni Jehramae ang iyang ginikanan nga sila si Mommy Jecel ug Daddy Delfin gumikan kay gawas nga mao kini ang nagmatuto kaniya, mao sab kini ang kanunay nga nagtuklod kaniya aron nga subayon ang maayo nga dalan kun diin mao kini ang naggiya kaniya sa pagkab-ot sa iyang mga pangandoy sa kinabuhi.

“Mao gyud siguro nga dili kaayo ko ma-pressure  sa competitions nga akong maapilan kay I am well pampered sa akong parents”, siya miingon.

Sa duha ka  tuig  nga pagsalmot  og mga singing contest , aduna na siya’y daghang mga nakab-ot ug naani nga mga kasinatian kun diin mao kini ang magsilbi nga hagdanan nga malig-on pa siya isip performer.

Gawas nga nahimo siya nga “Tawag ng Tanghalan” contender, nahimo sab siya nga kabahin sa Idol Philippines kun diin nakasulod siya sa Top 20.

Sa iyang mga naabot sa kinabuhi,  anaa gyud kanunay nga nagpaluyo ug nagsuporta ang iyang mga ginikanan ilabi na sab ang iyang  mga igsuon. Matud pa niya nga pinangga gyud siya niini gumikan kay gawas nga siya ang kinamanghuran, kanunay sab gyud sila nga nagsinuportahay sa ilang tagsa-tagsa ka mga tinguha sa kinabuhi.

Sa wala pa makab-ot ni Jehramae ang iyang mga naangkong mga kadaugan sa kauluhan, miagi sab siya og kapakyasan. Gani, ang iyang tinguha nga mahimong kabahin sa Sinulog Idol ,wala dayon maabot kaniya niadtong 15 pa lang siya.

Ikaduha na diay siya ni-audition sa Sinulog Idol ug nasuwertian lang siya pag-abot sa season 11.

Nakaingon siya niadtong higayona nga dunay gyu’y oras nga gitagana alang kaniya.

Tuod man, ang mga agak sa mga nagpalibot kaniya mao ang kanunay niya nga gipasalamatan gumikan kay mao kini ang mitabang kaniya aron maabot kun asa na man siya karon.

Nahimo usab siya nga kabahin sa labing una nga “Tingog nga Talisaynon” nga gipasiugdahan  sa Talisay City Government.

Sa maong unom ka gabii nga sangka, midaog si Jehramae tali sa siyam niya nga kauban.

“Para nako, I am there to take the step to be prepared on what’s next for me. Same siya sa Sinulog Idol nga moagi og elimination nights before the finals and blessed kaayo ko nga nakaya nako ang pila ka tough nights of the competition”, matud pa niya.

Pagkahuman  sa maong kompetisyon sa Dakbayan sa Talisay, sa sunod buwan, mibalik na sab siya og pagpaubos sa audition sa Sinulog Idol kun diin mibalik siya nga puno na sa pagpangandam.

“I came prepared kay para nako it’s really a battle sa mga maayo nga mga singers and ganahan gyud ko nga maapil ko this year”, si Jehramae miingon.

Tungod sa Sinulog Idol, nadugangan ang iyang kaalam sa  uban pa nga mga estilo sa pagkanta.

“Bisan og nakaagi ko og voice lesson pero I am a person nga ganahan gyud nga makat-on ug nanginahanglan pa og knowledge para makatabang sa pagkanta and para nako ang Sinulog Idol is a great venue ”, suma pa niya.

Gani, labaw pa sa pagkanta ang iyang nahibal-an gumikan kay dili lang ang iyang pagkanta ang nabaid apan nakat-unan na niya kun unsaon niya  pagdala ang iyang kaugalingon kun asa man gani siya ihatud sa iyang destinasyon.

“Joining Sinulog Idol is truly the best blessing nga akong nadawat. Gawas nga blessed ko sa family, blessed sab ko nga naa koy Sinulog Idol family na karon. Kini nga extended family nako karon mao ang naghatag nako og pako nga makalupad gyud sa kung asa ko ganahan nga mopaingon sa akong career”, padayag ni Jehramae.

Gikonsiderar sab niya nga swerte siya nga pagkatawo nga bisan pa man sa mga kaagi niya sauna, nakalingkawas ra gyud siya niini ug miabot na gyud sa iyang mga palad ang makagunit sa dako nga tropeyo nga mao ang ganti sa mahimong Sinulog Idol.

Karon nga siya na ang kasamtangang mihupot sa maong titulo, buot niya nga i-enjoy ang tibuok tuig sa dili pa niya ipasa ang iyang titulo sa laing moangkon niini.

Tambag pa niya sa ubang mga tawo nga gustong mahisama kaniya, paglaom ug madasigon lang sa Ginoo kanunay ug dili lang kalimtan nga mangandam ug mahimo kanunay nga “warrior”.

“As a warrior, dili na gyud angayan nga magduda sa kaugalingon ug sa talent,” panapos pa niya.