Rock Night: Duha ang natagak

CEBU, Philippines – Duha ang nataktak atol sa  ikalimang gabii (Rock Night) sa Sinulog Idol Season 11 nga didto gipahigayon sa Fuente Osmeña. Sila si Stephanie Dugaduga ug Angelito “Tolits” Alia mao ang nangatagak sa maong  kompetisyon.

Gikanta ni Tolits ang  “Zombie” nga orihinal nga giawit sa The Cranberries.

Giangkon ni Tolits nga dili gyud haom kaniya ang genre nga rock.  “Lisuran gyud ko sa rock. Yes, nangandam ko para sa rock night pero my best wasn’t good enough,” suma pa niya.

Aminado siya nga dili kini maoy katapusan sa  pagsagobang sa agianan paingon sa kalampusan.

“Wala ko mihilak kay kahibalo man ko daan nga it’s not my night. One thing that I have learned during my Sinulog Idol journey is to be strong no matter what”, si Tolits mipadayag.

Ang laing nataktak nga si Stephanie niawit sa  orihinal nga kanta ni Lady Gaga nga “Bad Romance”.

Matud pa ni Coach Apple Abarquez nga sa ka-intense sa iyang gipakita nga performance, wala na siya’y focus sa iyang kanta.

Emosyonal  si Stephanie sa dihang gianunsyo ang iyang pangalan nga usa sa mataktak  sa maong kompetisyon.  “Sa tinuod lang, pressured gyud kaayo ko. Ako baya gihatag akong best sa every performance nako. Ang tinuod gyud nganong pirti nakong hilak kay hadlok kaayo ko nga makasab-an sa akong parents kay nag-expect sila nga masulod ko sa finals”, matud pa ni Stephanie.

Nadawat ra niya ang resulta ug gitataw niya nga dako gyud og natabang ang pagsalmot niya sa Sinulog Idol. Igsoun ni Stephanie ang Sinulog Idol Season 10  first runner up nga si Suzanne Dugaduga.

Kun paningkamot ang hisgutan, ang 22 anyos nga freelance band vocalist nga si Marichar Labado ang inanay gyud nga mibira sa iyang kaugalingon aron nga dili na mameligro ang iyang posisyon sa kompetisyon.

Napili si Marichar isip Star of the Night.

Giawit niya ang “Highway To Hell” sa AC/DC.