Bb. Cebu 2020: Pambato sa san fernando nagmadaogon

CEBU, Philippines – Tigi  sa kaanyag  ug  sa pagka-utokan  ang nipatigbabaw sa koronasyon sa  Binibining Cebu 2019 niadtong  Lunes sa gabii  nga nagtangag sa gold nga tema. Ang koronasyon gipahigayon  sa Pacific Grand Ballroom sa Waterfront Hotel and Casino.

Gikan sa 54, gihashasan ang mga kandidata sa unang round patighug sa Top 20. Ang mga kandidata nga nalakip niini mao silang Bb. Madridejos - Jessa Mangubat; Bb. Lapu lapu - Chloe Boone; Bb. Bantayan - Juvel Duvay; Bb. Naga City - Victoria Ingram; Bb. Mandaue City - Ena Velasco; Bb. Ginatilan - Princess Paraiso; Bb. Borbon - Ciairha Monsanto; Bb. Pilar - Doanne Manhilot; Bb. Carcar City - Marla Alforque; Bb. Ronda - Sharon Angel; Bb. Carmen - Dannika Ocampo; Bb. San Fernando - Beatrice Gomez; Bb. Cebu City South - Adriana Gravador; Bb. Poro - Mariafe Loayon; Bb. Talisay City - Karla Lasquite; Bb. Consolacion - Shara Servande; Bb. Tudela - Cianza Gutierrez; Bb. Toledo City - Kathlyn Lawig; Bb. Cordova - Ameena Allababidi; ug si Bb. Dalaguete - Amanda Basnillo.

Pagkahuman og tawag sa Top 20, adunay dakong announcement nga gipahibalo ang mga nagdumala sa Binibining Cebu ug kini mao ang nasabutan nila nga himuon kining Top 21 gikan sa naandan nga Top 20.

Ang maong maayong balita ug hukom sa kadagkuan sa maong kompetisyon mao ang pag-abante ug paglakip sa final round sa Bb. Cebu City North nga si Betty Davis.

Gisunod dayun ang Swimsuit competition nga maoy gihimong basehan sa pagpili sa Top 12.

Ug niining tungura, nipadayon sa next round sila si Bb. Lapu-Lapu City, Chloe Boone; Bb. Bantayan - Juvel Ducay; Bb. Naga City - Victoria Ingram; Bb. Cebu City North - Betty Davis; Bb. Mandaue City - Ena Velasco; Bb. Ginatilan - Princess Paraiso; Carcar City - Marla Alforque; Bb. Ronda - Sharon Angel; Bb. San Fernando - Beatrice Gomez; Bb. Toledo - Kathlyn Lawig; Bb. Cordova - Ameena Allababidi ug si Bb. Dalaguete - Amanda Basnillo

Gisunod dayun ang Evening Gown competition sa dose ka finalists, usa ra ka desenyo sa gown ang ilang gisul-ob nga color gold nga gimugna sa garbo sa Sugbo ug ni master couturier nga si Cary Santiago. Pagkahuman sa maong segment, gisunod dayun ang duha ka set sa question and answer.

Nabuhi ang kinabag-an sa pagsugod og istorya ni Bb. Cordova nga si Ameena Allababidi kinsa misaysay kabahin sa iyang kasinatian sa higayon nga motug-an siya sa iyang tinuod nga pangidaron.

Daghan ang makugang kun tubagon niya nga 18 pa lang siya ug hingkod na ang iyang barog.  Ang pagkanatural ug pagkamatinud-anon ni Ameena mao ang naghatod kaniya aron nga maangkon niya ang korona ug titulo nga Binibining Cebu – Tourism 2020.

Si Betty Davis kinsa mao ang nahimutang isip Top 21 mao ang nahimong Binibining Cebu – Charity 2020.

Ang pambato sa Dakbayan sa Carcar nga si Marla Alforque mao ang nahimong Binibining Cebu - Heritage 2020 ug si Amanda Basnillo, mao sab ang nahimong  Binibining Cebu - Ecology 2020.

Ang 24 anyos nga si Beatrice Luigi Gomez nga mibandera sa San Fernando mao ang nakoronahan nga Binbining Cebu 2020 kun diin gidawat na niya gikan ni Binibining Cebu 2018-19’ Steffi Rose Aberasturi ang katungdanan isip bag-ong rayna nga mao ang usa sa mangulo sa mga kalihukan sa SHS Batch ’85.

Ang kalmado nga pagkatubag sa atleta nga si Beatrice sa pangutana nga “Some kids live on the street and have nothing in life.

As a Binibining Cebu, how can you inspire little kids like them to never stop dreaming?”  mao ang nakahatod niya aron nga maangkon niya ang gikahinaman nga korona ug titulo nga gitinguha sa 54 ka mga kandidata nga nagikan sa nagkadaiyang lungsod ug siyudad sa Probinsiya sa Sugbo.

Usa sa iyang adbokasiya  mao ang youth empowerment pinaagi sa  sports.  Pakpakan gyud kanunay si Beatrice sa matag higayon nga molugwa siya sa entablado .

Nagsugod nga mihumot ang pangalan ni Beatrice sa dihang misalmot siya sa Miss Cesafi niadtong 2012. Gani, nahinumduman si Beatrice sa dihang misalmot siya sa Miss Mandaue 2015 kun diin mitapos siya isip 2nd runner up.

Pipila ka tuig nga mipahuway si Beatrice sa pagsalmot og indigay gumikan kay giuna niya ang paghan-ay sa iyang karera. Ug karon, sa iyang pagbalik sa kalibutan sa indigay, wala gyud siya nga masipyat nga makaangkon og korona ug sa dakong titulo.

Alang kang Beatrice, ang pag-angkon niya sa titulo isip Binibining Cebu 2020 magsilbi kini nga dakong katungdanan kun diin hatagan niya og luna ang mga tawo nga wala pa hingpit nga makapadayag ug magpakita sa ilang tinuoray nga pagkatawo.

Ang mga panghitabo sa ikatulo nga Binibining Cebu 2020 maingon nga motatak na gyud kini sa kadaghanan sanglit mao sab kini ang labing una nga ang Miss Universe 2018 nga si Catriona Gray mihalad  og awit.