Sandara misuroy sa Bohol

CEBU, Philippines — Sa pagbisita ni Sandara Park dinhi sa Pilipinas dili pa lang dugay, wala gyud niya sipyata ang pagtikang sa Bohol.

Usa sa gibisita  sa maong sikat nga Korean star mao ang  ilado kaayo nga Chocolate Hills.

Nakauyon matud pa si Sandara sa kanindot sa Bohol busa iyaha gyud kini nga gipasigarbo sa iyang social media account.

Dili kini maoy unang higayon nga nilaag si Sandara sa Bohol sanglit nakasuroy na siya sa maong dapit niadtong 2016 , ang tuig diin nahimo siya nga usa sa mga hurado sa   ABS-CBN talent search  nga “Pinoy Boyband Superstar”.

Morisette, nagsorry...

Nipagawas na og statement ang kampo sa singer nga si Morisette  Amon pinaagi sa fan page  niini kagahapon.

 Nangayo og pasaylo si  Morissette sa  iyang gibuhat  ilabi na  kang Joebert Sucaldito nga maoy producer sa birthday concert, diin siya nag-walkout niadtong nilabay nga semana. Nangayo sab siya og dispensa ngadto sa mga tawo nga nagpaabot nga molugwa siya sa entablado niadtong gabhiona.  Giangkon niya nga mahadlok gyud siya mohisgot sa kasamtangan relasyon niya sa iyang pamilya gumikan kay dili siya ganahan nga maapektohan ang proseso nga sila magkauli puhon.

Nangayo usab siya og dispensa sa TV reporter nga si Mario ug nakasabot siya nga tipik lang kini sa iyang trabaho. Nihangyo usab siya sa iyang fans nga iampo siya aron hingpit siya nga mahaw-as sa maong isyo.

 ”I am overwhelmed though by those who reached out to me with love and support, not just these past couple of days but earlier on this year, during this particularly painful season of my life.. I appreciate all of you”, tipik sa statement sa singer.

Bugoy mitingog na!

Human sa taod-taod nga pagpakahilom, nitingog na gyud  ang kanhi miyembro sa Hashtags nga si Bugoy Cariño kalabot sa taod-taod na nga tsika nga nakapamabdos siya kaniadto hinungdan nga gitangtang siya sa noontime show sa ABS-CBN nga  It’s Showtime.

Wala hinoun niya giklaro kun unsa ang rason sa pagkatangtang niya sa maong show.

Giangkon niya nga gimingaw na siya sa showbiz ug andam na siya mobalik niini.

Panghinaot niya nga mahatagan siya og proyekto sa ABS-CBN. Apan kun dili siya  makaangkon og proyekto sa kanhi niya mother network, andam siya motrabaho sa GMA-7.

Pag-deny ni Ruru gikaluy-an

Wala makumbinsir ang  pipila ka netizens  sa paghimakak ni  Ruru Madrid kalabot sa taho nga  nag-away sila sa gidungog niya nga uyab nga si Bianca Umali pagkahuman sa red-carpet premiere sa Cara X Jagger  niadtong November 5.

Matud pa nga daghan kaayo ang nakakita sa panaglalis sa duha  kun diin naabot sa punto nga hapit naligsan si Ruru sa gimaneho nga sakyanan ni Bianca.

Una na nga gihimakak ni Ruru ang maong taho ug nihangyo kini nga dili nalang padak-on ang maong isyu.

Dunay netizens ang nipadayag nga naluoy sila kang Ruru gumikan kay tataw nga gusto lang niini nga dili mosamot ang away nila ni Bianca.  Sa mga nanggawas nga report sa miaging adlaw, gikatahong giselosan ni Bianca ang kapares ni Ruru sa Cara X Jagger  nga si Jasmine Curtis Smith.