Angayan atangan

Tsika pa ni Iza Calzado nga bisan mubo ra ang eksena ni John Lloyd Cruz sa pelikulang Culion, giingong usa kini sa angayan atngan nga eksena. Nagpanikad na og maayo ang fans ni Lloydie sa maong pelikula  ilabi na nga taod-taod na nga nipahuway ang aktor sa pag-arte.

Mo-relax gyud

Bisan sa ka-busy sa trabaho,  kinahanglan nga mogahin gyud og adlaw nga mag-relax. Mao kini ang prinsipyo  sa aktres nga si Kathryn Bernardo. Mahiligon si Kathryn nga mobakasyon og laing nasud. Gihulagway niya kini nga reward sa iyang kaugalingon.

Janine bida sa pelikula

Usa si  Janine Gutierrez sa  mga bida sa pelikulang  Babae at Baril. Nitabang  ang GMA Artist Center sa  pag-promote sa maong lilas. Mapasalamaton si Janine sa stable nga dagan sa iyang career.

Nag-birthday sa Turkey

Nitikang  si Joey de Leon  sa Turkey kauban ang iyang  asawa nga si Eileen. Gisaulog ni Joey  ang iyang 73rd birthday niadtong Lunes.  

Reunion project

Mabanhaw ang tandem nila ni Polo Ravales ug Sunshine Dizon. Mag-uban ang duha sa bag-ong afternoon drama series sa GMA-7 nga  Magkaagaw.  Kahinumdoman nga sikat kaayo sila nga magka-loveteam niadtong teenager pa sila.

Alyssa ipares kang Dennis

Si Alyssa Muhlach ang kapares ni Dennis Trillo sa horror movie sa Star Cinema nga  Hellcome Home. Nalakip usab sa maong movie project sila si Beauty Gonzales ug Teejay Marquez .

Sayaw nga eksena

Ang eksena kun diin nagsayaw sila si Maine Mendoza ug Carlo Aquino maoy usa  sa mga makaliki nga parte sa pelikulang Isa Pa With Feelings. Nagsugod na kagahapon ang pagpasalida niini sa mga sinehan.

Andam makig-uli

Gitataw ni  Sheryl Cruz nga bukas siya sa posibilidad nga magtingog  na sila  sa  iyang ig-agaw  nga si  Senator Grace Poe. Nag-ugat ang ilang pagdedmahay tungod sa isyu  sa tagsa-tagsa nila nga pamilya.

Sayo nga regalo

Duha ka fans  ni  Vice Ganda ang makadawat og early Christmas gifts gikan sa ilang idolo. Ang usa ka fan ni Vice ni-tweet nga nahutdan siya og limited edition sa  BT21 collection sa ViceCosmetics. Gipangayoan kini ni Vice og address ug padalhan niya kini sa maong produkto. Samtang  ang lain niya nga fan nihangyo kaniya og outfit alang sa  tambongan niini nga senior ball. Wala maglangan og tubag si Vice, ug nisaad nga hatagan niya kini sa gihangyo nga outfit niini.