Dugang pelikula alang kang Marco

CEBU, Philippines — Dili na gyud mabangbang ang showbiz career ni Marco Gumabao gumikan kay pagkahuman sa  pelikulang Just A Stranger nga showing na kagahapon,  ma-busy na usab siya sa iyang follow-up movie project.

Malakip  si Marco sa pelikulang In Between Goodbyes sa  Viva Films kun diin makauban niya sila si  Lovi Poe ug Tony.

Ang  award-winning director nga si Joel Lamangan  maoy mogama niini.

ASAP Coverboys gipangita sa fans

Nibaha ang mga sugyot nga unta naay reunion nga mahitabo  sa kanhi sikat nga boy group sa ABS-CBN nga  ASAP Coverboys.  Nasayran nga nibalik na si Rafael  sa nataran sa   Kapamilya network hinungdan nga nitumaw ang maong sugyot.

Kauban ni Rafael sa ASAP Coverboys kaniadto mao sila si Jake Cuenca, Victor Basa, Ron Morales, John James Uy, Marvin Raymundo, Jon Avila, Zanjoe Marudo, ug  Will Devaughn.

“Yea, anything is possible. I mean I would like to see those guys again, nami-miss ko nga silang lahat e. To be in a group again and do something entertaining for the people, yes of course,” saysay pa ni  Rafael ngadto sa entertainment website nga PUSH.

Tungod sa kasikat sa maong grupo, nakabaton na kini og major concert kaniadto.

Catriona nahuwasan na

Gitataw ni Miss Universe  2018 Catriona Gray  nga okay ug malipayon na siya karon sukwahi sa iyang IG post sa miaging adlaw nga naghisgot nga  nag-agi siya og pagsulay. Suma pa sa beauty queen nga susama rapud siya ubang tawo nga mag-agi og mga pagsulay.

Nagpadayon si Catriona sa iyang adbokasiya  alang sa kabataan butang nga gipasigarbo og maayo sa iyang fans.

Gusto og pribado

Gusto sa  Asia’s Next Top Model nga si Maureen Wroblewitz   nga himoong pribado  ang istado nila  sa singer nga si JK Labajo.

Wala  modirekta og tubag ang duha sa pangutana kun tinuod ba nga nagkasinabtanay na silang duha.

Makadaghan na nga higayon nga nakit-an ang duha nga nanuroy nga sweet kaayo.

Nag-uban usab sila  sa birthday party ni Mother Lily Monteverde sa miaging gabii.

Positibong pagsagobang sa isyu

Laing  Instagram post ni Bea Alonzo ang gipistahan karon  sa   netizens ug nagdalit kini og inspirational message ingon man usab sa paghigugma sa pamilya.

“In the midst of my home renovation, I was going through old photos to choose what to put on our family wall when I saw this picture.

I think I was one year old when this picture was taken. My mom carrying me and I had the biggest smile as I was enjoying my chocolate given to me by my lola,” tipik sa iyang   post.

Suma pa ni Bea nga nagpuyo lang siya kaniadto sa simple nga kinabuhi ug na-feel gyud niya ang tinud-anay nga gugma.

“Simple lang ang buhay. I was not born with a silver spoon in my mouth but I was raised knowing that I am loved. Knowing this warms my heart. I hope you could see how big my smile is right now while reminiscing my childhood. “#OneDayAtATime,” dugang post sa aktres.

Tataw nga positive vibes ang ipatigbabaw ni Bea karong panahona ug wala kini manumbaling sa dihang gipikhan siya ni Julia Barretto sa IG duha ka semana na ang nilabay.

Kahinumdoman nga nahimong  init nga isyu ang breakup nila ni Bea ug Gerald Anderson. Na-link si Julia ngadto  kang Gerald.

Una na nga gihimakak ni Gerald ang taho nga dunay kalambigitan si Julia sa breakup nila ni Bea.

Mattero mipasigarbo sa Cebuano director

Gipasigarbo  pag-ayo  ni Matteo Guidicelli    ang  direktor sa iyang pelikula nga Mina-Anud  nga si  Kerwin Go  gumikan sa mga positibong feedback nga nadawat sa maong pelikula.

Suma sila  ni Direk Kerwin nga usa pud ka   Sugbuanon.

I’m so happy and so proud of him that it’s come to life. So far it’s very successful. It was the closing movie sa Cinemalaya and so far there’s been a lot of positive feedback about the film so I’m very, very proud of direk Kerwin. He’s a proud Cebuano and to represent Cebu this way,” saysay pa ni Matteo nga namantala sa PUSH.