Daring project suportado sa bf

CEBU, Philippines — Blooming kaayo si Mylene Dizon gumikan sa tulin nga relasyon nila sa iyang boyfriend nga si Jason Webb.

Nasayran nga  unom ka tuig na sila isip mag-uyab ug susama sila nga dunay mga anak sa kanhi nila nga partner.

Gitataw ni Myle nga wala  sila’y plano nga magpakasal  gumikan kay kontento na sila sa ilang sitwasyon karon.

Malipayon ang aktres gumikan kay supportive kaayo ang iyang boyfriend sa iyang showbiz career ilabi na ang pagdawat niya og daring projects.

Nasayran nga dunay love scene sila si Mylene ug   Kit Thompson sa pelikulang Belle Douleur.

Miles ug Rocco magpares

Malipayong gipahibalo sa TBA Studios  nga kasamtangan nila nga gigama karon ang romantic movie nga nag-ulohan og ‘Write About Love’.

Ang Kapamilya star nga si Miles Ocampo ug ang Kapuso actor nga si Rocco Nacino maoy magpares sa maong pelikula.

 Mao kini ang labing unang higayon nga magpares sa usa ka pelikula sila si Rocco ug Miles.

Gikatakda kini nga ipasalida karong  October  ug ubos kini sa direksyon ni  Crisanto Aquino.  Nalakip usab sa maong pelikula sila si Yeng Constantino ug Joem Bascon.

Gipaila-ila na sa ginikanan

Malipayon si Markus Paterson gumikan kay naila-ila na niya sa personal ang ginikanan sa aktres nga si Janella Salavador.

Gihulagway ni Markus si Janella nga maayong tawo, guwapa ug dili basta-basta ang talento sa pag-arte.

Wala pa gyud nitingog ang duha sa   tinud-anay  nila nga  istado. Apan igo ra nilenggua si Markus nga malipayon siya kun si Janella ang iyang kauban.

Bea mikulit og atensyon sa international scene

Bisan pa man sa mga isyu nga gisagobang karon ni Bea Alonzo, wala kini makaapekto sa paglawig  sa iyang pangalan sa international scene.

Nasayran nga nakadawat og mga positibong review  ang horror film niya nga  Eerie ug namantala sa mga nagkadaiyang media outfit sa laing nasud.

Nasayran nga gipalugwa sa Netflix ang maong pelikula.

Sa usa ka artikulo nga sinuwat ni Roxy Simons sa United Kingdom-based news site nga  Daily Mail, gipadayag niya nga makahadlok gyud ang maong pelikula.

“Filipino horror film Eerie has left fans so terrified they can’t sleep with the lights off,”  matud pa niya.

Ang laing  UK-based news site nga  The Independent nagkanayon nga pipila ka viewers ang nipadayag nga ang Eerie nagbilin gyud nila og kahadlok.

Samtang si Nerisha Penrose,  writer sa American fashion ug  lifestyle magazine nga  Elle, nakadayeg  sa nahisgotang pelikula gumikan kay dili gyud matag-an ang mahimong dagan sa istorya.

 “A scary movie can’t be considered great unless it’s full of jump scares, unpredictable twists, and leaves you so afraid you refuse to sleep with the lights off. According to thriller-obsessed folks on Twitter, Netflix’s new horror film Eerie checks off all of the above,” suma pa niya,

Si Ale Russian sa American entertainment magazine  nga People, nihulagway sa Eerie nga  “really good horror.”

Nitumaw usab ang mga review nga nagdayeg sa  ka maayo moarte ni Bea.  Nalakip usab sa maong pelikula si Charo Santos.

Heart nagpanikad sa iyang libro

Nagpanikad na si  Heart Evangelista sa gikatakdang   pag-release  sa iyang fashion book nga Styled with Heart nga mahitabo sunod buwan.

Una na nga gibutyag sa aktes nga passion gyud niya ang fashion busa dakong garbo alang kaniya nga makagama og kaugalingong libro.

Espesyal alang kang Heart ang maong libro gumikan kay dako kaayo og natabang  niini ang iyang higala nga si  Kevin Kwan, ang author sa best-selling novel nga Crazy Rich Asians.

Alden gipaubos og immersion

Mipaubos  gyud og immersion  ang  aktor nga si  Alden Richards aron mahatagan niya og hustisya ang iyang  role sa umaabot nga Kapuso series nga The Gift.

Nasayran nga modala siya isip buta sa maong teleserye.

Hangtud karon,  padayon pa nga gipangita sa GMA-7 ang aktres nga mahimong kapares ni Alden sa maong proyekto.

Mapasalamaton ang aktor sa nagsagunson niya nga projects.  

Padayon nga gilinyahan sa mga sinehan ang pelikula nila ni Alden ug Kathryn Bernardo nga Hello, Love, Goodbye sa Star Cinema.

Elisse ug Jameson nagkasinabtanay na?

 Niulbo karon ang tsika nga nagkasinabtanay na  matud pa sila si Elisse Joson ug Hashtags member nga si  Jameson Blake.

Gidungog kaniadto  nga nakaaway ni  Jameson ang kauban niya sa Hashtags nga si  McCoy de Leon kinsa ex-boyfriend ni  Elisse. Nasigpatan nga mag-uban na karon a pag-panglaag sila si Elisse ug Jameson.