Sugbuanon maoy 3rd runner-up

Miss Global Universe 2019

CEBU, Philippines — Ang Cebuana nga pambato sa Pilipinas nga si  Letelle Perez maoy napili nga  3rd runner-up  sa bag-ohay lang  nga Miss Global Universe  2019 (Miss Lumiere International)  nga gipahigayon didto sa Singapore.

Naangkon usab niya ang minor award nga Queen of People Choice  .

Gipasigarbo gyud niya ang iyang pagka-Sugbuanon nga morepresentar sa nasud sa usa ka international pageant.

Taga  Danao City  si Perez  ug dako gyud ang iyang pasalamat sa iyang pamilya  ug mga higala nga nihatag gyud og dakong suporta sa pagsalmot niya sa maong prestihiyosong indigay.

Aminado si Perez mubo ra gyud ang oras sa iyang preparasyon  apan naningkamot gyud siya og maayo nga mahimong tulin ang iyang performance sa maong indigay.

Gihunahuna niya ang grabeng  suporta  sa mga Pinoy ug mao kini ang naghatag og kusog kaniya.

Si Miss USA ang nakaangkon sa titulo nga Miss Global Universe . Si Miss China  ang 4th runner up, samtang ang pambato sa France  maoy 2nd runner-up. Napili nga 1st runner-up  ang representante sa  Mexico .

Dili  gyud basta-basta ang mga Sugbuanon kun maghisgot na og mga indigay.  Kahinumdoman nga ang representante sa Talisay City, Cebu nga si Gazini Ganados maoy napili nga Miss Philippines Universe 2019   busa siya ang atong pambato sa  Miss Universe pageant karong tuiga.  Laing Sugbuanon nga si  Samantha Ashley Lo mao usab ang pambato sa nasud alang sa Miss  Grand International 2019.