Serenata Italia 2:Concert for a cause

CEBU, Philippines — Mapuno sa bugnaw ug hugyaw nga huni ang concert nga mahitabo diha sa Waterfront Hotel and Casino-Lahug karong Biyernes sa gabii, Pebrero 22, 2019.

Pagahimuon sa maong petsa ang concert  nga gidumala sa Tabor Hill College - OAD nga nag-ulohan og “Serenata Italia 2”

Ang maong konsyerto magsilbi nga concert for a cause ug ilusad sab sa maong gabii ang kasaulogan sa ika-25 ka tuig sa Order of the Discalced Augustinians in the Philippines.  Gani, angayan nga atangan ang pasundayag sa all male choir nga nagikan pa sa Italy,  ang “Coro Maddelene”.

Suma pa sa project director ug concert producer nga si Father Renel Cabag, OAD, nga mao na kini ang ikaduhang pagpasundayag sa maong grupo dinhi sa Sugbo. Ang katapusang paglugwa niini dinhi sa Sugbo, nahitabo niadtong 20 ka tuig na ang nakalabay nga gipahigayon didto sa  Marco Polo.

Dili sab angay nga sipyaton ang performance sa Asia’s Queen of Songs nga si Pilita Corrales ug sa bag-ohay nga napundok nga orchestra nga mao ang  Harmonia Cealestis Orchestra.

Nasayran nga nakatatak na gyud sa Sugbo ang dili basta-basta nga tingog ni Pilita  ug pabilin gihapon  kini nga gihangop sa mga Sugbuanon ilabi na ang makabihag niya nga tingog nga wala gyud mahupas.

Samtang ang conductor sa Harmonia Cealestis Orchestra  mao ang inila kaayo nga personalidad  sa musika nga si  Maestro Alessio Benvenuti nga usa ka banggiitan nga violinist,

Dili usab magpaulahi  sa pagpakita sa iyang hugyaw nga talento sa pagkanta ang Sinulog Idol Season 10 finalist nga si  Jake Batiancela. Adunay duha ka bahin sa pasundayag nga naglangkob sa  Matinee sa 2:30 sa hapon ug ang Gala nga mahitabo sa alas 7:30 sa gabii.

Mapalit ang ticket sa P1000, P800, ug sa P500. Ang halin sa tickets mapaingon kini  sa nagpadayon nga konstruksyon sa Tabor Hill College Building and Seminary. Suma pa ni Fr. Renel  nga  gawas sa kalingawan nga maangkon sa mga manan-aw , makatabang usab sila sa ilang proyekto.