Propesyonal gyud

CEBU, Philippines — Nibilib gyud si JC de Vera sa ka-propesyonal ni Kim Chiu atol sa shooting sa  pelikula nila nga "One Great Love". Matud pa niya nga lahi ra gyud  si Kim sa dihang gibuhat nila ang ilang intimate scenes ug gibuhat gyud niini ang tanan aron dili sila kiwawan sa usag-usa.

Mag-inusarang maghilak

Gitug-an ni Toni Gonzaga nga naapektuhan siya pag-ayo sa mga kritiko nga iyang mabasahan kaniadto sa mantalaan una pa nisulod sa showbiz ang iyang manghod nga si Alex Gonzaga.  Giingong maghilak si Toni nga mag-inusara sa higayon nga makadungog siya og mga bati nga pulong nga gibato ngadto sa iyang igsuon.

Magpakonsulta gyud

Gibutyag ni Michael de Mesa  kinsa mas naila karon isip si Ramil "Manager" Taduran sa FPJ's Ang Probinsyano nga nakaangkon siya sa iyang second chance sa pagpakabuhi niining kalibutana human nga nakasinati og sakit nga Hepatitis C sulod na sa 18 ka tuig. Tambag pa sa aktor nga magpakonsulta sa doktor kun adunay mabatyagan nga dili normal nga pamati sa lawas aron dali kini nga  maalibyuhan .

Tutukan ang karera

Andam na si Cristine Reyes sa laing hugna sa iyang karera sa Kapamilya network human nga mi-renew sa iyang kontrata dili pa lang dugay. Desidido ang aktres nga tutukan ang iyang karera ug dili magpaapekto sa iyang mga personal nga isyu.

Saludo kang Jed

Saludo gyud si Lea Salonga sa talento sa world class singer nga si Jed Madela kinsa nagsaulog sa iyang ika-15 nga anibersaryo sa music industry. Matud pa ni Lea nga angayan nga hatagan og pagtagad ang mga singer nga sama kang Jed. “It’s kind of a milestone and for somebody of his talent, he actually deserves to be an even bigger star,” suma pa ni Lea.

Mopahiyom ra

Tsika pa ni Sylvia Sanchez nga igo lang mobalos og pahiyom ang iyang anak nga si Arjo Atayde sa matag higayon nga hisgutan nila si Maine Mendoza. Matud pa ni Sylvia nga dili pa andam modetalye ang iyang anak mahitungod sa istado nila ni Maine. Gipasalig hinuon ni Sylvia nga suportahan gyud niya ang mga butang nga ikalipay sa iyang anak.

Fried chicken

Giasoy ni Maymay Entrata nga pirmanente na gyud sila nga makakaon sa iyang pamilya og fried chicken human siya nga nakadaog sa Pinoy Big Brother. "Nakakain na namin yung gusto naming kainin like yung fried chicken kasi pang-birthday lang naman yon sa amin dati. Tapos ngayon parang… natutuwa lang ako na halos araw-araw na silang kumakain noon", suma pa ni Maymay.

Mangunay alang sa pamilya

Hands-on gyud si Marian Rivera ngadto sa iyang pamilya bisan og nagsabak siya. Matud pa niya nga siya gyud ang nangamot og butang og mga dekorasyon sa ilang panimalay. Dugang pa niya nga karong umaabot nga Pasko, siya sab ang mangunay og hikay ug dili kini niya isangon sa uban.

Non-showbiz gf

Mapasigarbuhon gyud nga gipailaila ni Gab Valenciano sa publiko ang iyang non-showbiz girlfriend nga si Joann Santiago. Dakong kalipay ni Gab nga gisugot siya niini ato sa ilang scuba-diving trip sa Anilao, Batangas. Nagt-rending usab ang ilang litrato sa Instagram tungod sa palahi nga proposal nga gihimo ni Gab ngadto sa iyang girlfriend.

Andam makatrabaho ang ex

Andam na sab gyud si JM de Guzman nga makatrabaho ang iyang ex-girlfriend nga si Jessy Mendiola. Tulo ka tuig na nakalabay human nga natuldukan ang ilang relasyon. Matud pa ni JM nga dili na angayan nga ukayon ang ilang kagahapon tungod kay maayo na ang dagan sa ilang tagsa-tagsa ka mga kinabuhi.