Anniversary gift

CEBU, Philippines — Gisaulog nila ni Erwan Heussaff ug Anne Curtis dili pa lang dugay ang first anniversary sa ilang kasal. Usa sa mga regalo ni  Erwan kang Anne mao ang gamay nga elepante.

Giluto na

Gipaneguro gyud sa ABS-CBN nga mga lig-ong  teleserye  ang idalit nila sa publiko sa pagbukas sa 2019.   Pipila niini naglangkob sa Magica Blanca, Iron Heart, Nang Ngumiti ang Langit ug  Take Life .

Alden magpa-relax

Mobakasyon og usa ka buwan si Alden Richards aron makapahuway  og maayo.  Naghinapos na ang pantaserye sa aktor nga Victor Magtanggol. Nasayran nga nagpungasi ang trabaho ni Alden. Gawas sa Eat Bulaga , naa pa gyud siyay musical variety show sa  GMA 7 nga Sunday Pinasaya.

Makahilak nga pelikula

Gipasigarbo  pag-ayo nila ni Alessandra de Rossi ug Paoli Contis ang pelikula nila nga Through Night And  Day. Duna matud pa’y mga eksena nga makapahilak.  Nasayran nga sa Iceland gi-shoot ang pipila ka mga eksena sa maong pelikula. Mosikad na mga sinehan karong adlawa ang Through Night And  Day.

Proud sa bana

Gawas sa iyang pagka-badminton coach, nikuha usab og  kursong Aeronautics ang bana ni Ai Ai delas Alas nga si Gerald Sibayan.  Gipasigarbo pag-ayo  ni Ai Ai ang iyang bana gumikan kay duna  gyud kini pangandoy sa iyang kinabuhi.

Nakadawat na

Nadawat na ni Xian Lim ang kamatouran nga nabungkag na gyud ang tandem nila ni Kim Chiu sa TV screen.  Taod-taod na sila nga wala nagpares sa usa ka proyekto. Gitataw hinuon ni Xian nga wala gihapon naputol ang komunikasyon nila ni Kim.

Star-studded

Nagbaha gyud ang local stars nga nitan-aw sa Not In Your Lifetime concert sa grupong Guns N Roses sa Philippine Arena sa miaging gabii.  Pipila sa nitan-aw niini mao sila si Angel Locsin, Robin Padilla, Marielle Rodriguez, Gladys Reyes, Christopher Roxas, Patricia Javier, ug Bubbles Paraiso.

Hilig manuroy

Tsika pa ni  Jodi Sta. Maria nga bisan sa iyang ka-busy, gahinan gyud niya og panahon ang iyang anak nga si Thirdy aron suruyon ang ganahan nga mga lugar niini.  Kanunay gyud  niya dalhon sa laing nasud ang iyang anak.

Trabaho dayon

Duha ka buwan na ang nilabay human nanganak si Precious Lara Quigaman ug andam na kini motrabaho og balik.  Malakip ang beauty queen-actress sa advocacy-oriented film nga Sarah and Cedie sa Flying High Entertainment Productions . Pagadumalaon kini ni Direk Errol Ropero.

Dalawang Mukha ni Guadalupe

Ang mag-uyab nga Barbie Forteza ug Jak Roberto ang mga bida sa upcoming series sa GMA-7 nga Dalawang Mukha ni Guadalupe.  Matud pa nga sa January 2019 ang pag-ere niini.