Sarah nauyonan sa Japan
CEBU, Philippines — Tungod sa hugyaw nga performance ni Sarah Geronimo sa ASEAN Music Festival 2018 nga gipahigayon sa Japan dili pa lang dugay, gihatagan siya og gold coin sa mga organizer. Si Sarah maoy representante sa Pilipinas sa maong music festival nga gibitoonan sa nagkalain-laing sikat nga performers sa ASEAN.
Natuman na gyud
Tsika pa ni Kisses Delavin nga dugay na gyud niya nga gipangandoy nga malakip sa usa ka Kapamilya series busa nagmaya siya og maayo sa dihang nalakip siya sa Playhouse nga gibidahan nila ni Angelica Panganiban ug Zanjoe Marudo. Mao kini ang labing una niya nga serye sa ABS-CBN.
Eksena sa Iceland
Sa Iceland ang lokasyon sa shooting sa pelikula nila ni Alessandra de Rossi ug Paolo Contis nga Through Night and Day . Ang maong pelikula gipaluyohan sa Viva Films ug Octoarts Films ug gikatakda kini nga ipasalida karong November 14.
Mang Kepweng Adventures
Gamaon na pud sa CineKo Productions ang pelikula nga Mang Kepweng Adventures nga subling pagabidahan ni Vhong Navarro. Kahinumdoman nga si Vhong gihapon ang bida kaniadto sa Mang Kepweng Returns.
Tambongan ni Shaina
Gahinan gyud og oras ni Shaina Magdayao ang Tokyo International Film Festival aron suportahan ang pelikula niya nga Ang Panahon ng Halimaw. Mahitabo kini sa katapusang bahin karong buwana. Si Lav Diaz ang direktor sa maong pelikula. Dakong garbo alang kang Shaina nga makatambong sa usa ka prestihiyosong film festival.
Pambato karong 2019
Nakalinya sunod tuig ang laing season sa mga show nga gipang-franchise sa ABS-CBN. Naglangkob kini sa Little Big Shots, Pilipinas Got Talent, Pinoy Big Brother, The Voice of the Philippines ug World of Dance Philippines .
All Souls Night
Bisan sa simpling pagpuyo ni Andi Eigenmann sa Baler, nidawat gihapon kini og showbiz project. Si Andi ang bida sa pelikula sa Viva Films nga All Souls Night. Una na nga gibutyag ni Andi nga wala niya hingpit nga gibiyaan ang showbiz.
Busy to the max
Maglisod na si Zanjoe Marudo sa pagtuman sa iyang plano nga mobakasyon karong buwana tungod sa nagpusot-pusot niya nga proyekto. Dili gusto si Zanjoe nga masayang ang mga maayong opurtunidad nga nakab-ot sa iyang career karong panahona. Gawas sa seryeng Playhouse, busy usab kini sa pelikula nila ni Maja Salvador nga To Love Some Buddy. Si Jason Paul Laxamana ang direktor sa maong pelikula.
Gil gipares kang Solenn
Ang Kapuso heartthrob nga si Gil Cuerva maoy bag-ong co-host ni Solenn Heussaff sa lifestyle show sa GMA News TV nga Taste Buddies. Suma pa ni Gil nga makasabay ra gyud siya sa maong show sanglit mahilig pud siya mobiyahe.
D4
Gipanglantawan nga magmalampuson gihapon ang concert ni Daniel Padilla sa Araneta Coliseum karong October 13. Ang maong concert nag-ulohan og D4: Daniel Padilla Back at the Araneta. Kahinumdoman nga puros nagmalampuson ang mga concert niya kaniadto niadtong 2013, 2014, 2015 ug 2017.
Mahibalik kaha?
Nanghinaot ang fans ni Marlo Mortel nga mabanhaw na unta ang tandem nila ni Janella Salvador. Dako ang pagtuo sa fans sa aktor nga mahitabo kini sanglit nagkahupas na matud pa ang chemistry nila ni Elmo Magalona. Una na nga gidungog nga nag-away sila si Elmo ug Janella.
- Latest