#TeamJay
Jaypee Lao (Banat) - August 31, 2018 - 12:00am

CEBU, Philippines – “Para naku, kinabuhi na gyud nako ang pag make-up dili lang tungod kay anhi ko nagkuha sa akong source of income pero tungod passion sad gyud pod ni nako. Anhi ko malipayon, dili ko kapoyon og make-up. Ug samtang naa  pa ko’y kamot, mo make-up gihapon ko.”

Mao kini ang pagpabuhagay ni Jaytee Tariman, lumad nga taga Mandaue kansang nahimong make-up artist kapin na sa usa ka dekada.

Pagbalik lantaw niya sa pagsugod niya niining tanan, dili sayon matud pa ang iyang giagian tungod kay wa dayun niya makuha ang suporta sa iyang pamilya.

Wala nakauyon ang iyang amahan nga ang iyang Jr. kinsa maoy mosunod unta sa iyang pagkahamtung ug pagka brusko, mamahimong make-up artist.

Giangkon niya nga sa pagsugod, dako gyud nga gubot ang nahitabo tali kaniya ug sa iyang pamilya.

Matud niya, adunay mga higayun nga magtago-tago siyang mag-make-up sa iyang mga kliyente kaniadto sanglit sayod man siya nga kontra gayud niini ang iyang amahan.

Apan iyang gipanghingusgan nga matuman gayud ang iyang gidamgong mamahimong usa ka make-up artist tungod kay nasayud gyud siya sa iyang kaugalingon nga molungtad siya niining maong industriya ug mao sab gayud kini ang iyang gihigugma.

Ug tuod man, sa kasamtangang panahon, dako ang iyang kalipay tungod kay gidawat na siya sa iyang pamilya labi na sa iyang amahan uban sa pagsuporta kaniya sa natad nga iyang gisubay karon.

“Bata pa ko hilig na jud ko motan-aw og beauty pageant like Miss Universe tungod ani nagkat-on ko og make-up ug akong permi praktisan akong manghod nga si Janet. Hangtod nga akong manghod mag- apilan na og pageant,mag-uban uban ko ug mag-assist ni Miss Irene Gitgano ,ang make-up artist sa akong sister niadto,” saysay pa niya.

Gihimo niyang inspirasyon niining tanan mao ang suporta sa iyang pamilya ug ang pagsalig sa mga tawong mihangop sa iyang pagka make-up artist.

“Tungod sa akong pamilya, naningkamot gyud ko bahala na’g walay tulog laban gihapon para sab sa akong mga pag- umangkon nga  akong gipa-skwela,” suma pa niya.

Isip usa ka make-up artist, dakong kalipay matud pa niya ang iyang pagabation sa panahong dunay mga kliyente nga masuod na niya ug mahimo niyang mga higala ug mga kliyenteng malipay og dako sa resulta sa iyang pagpaanyag.

Dako ang iyang pagpasalamat sa iyang pagkamake- up artist sanglit mao kini ang iyang gisaligan sa matag adlaw niyang galastuhanan.

Nakatabang sab og dako ang iyang mga kinitaan sanglit mao kini ang nagamit sa dihang nasakit ang iyang ginikanan.

Sa kasamtangan sab, nakapatungha siya sa iyang mga pag-umangkon sa high school, senior high school ug college tungod sa iyang panginabuhian.

Apan labaw pa sa dakong recognition sa iyang pagka make-up artist mao ang dakong kahimuot nga iyang masinati kun molanog-lanog ang positibong reaksyon sa katawhan kalabot sa iyang output.

Suma pa, magpangita na gyud kaniya ang mga tawo nga iyang napaanyag.

Alang kaniya, ang pagkugi gyud ug diskarte sa kinabuhi maoy makapalambo sa kinabuhi sa tawo.

TEAMJAY
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with