#Hands of Donjie

CEBU, Philippines – Nagsugod ang panginabuhian ni Donjie Caña isip beautician   sulod sa taas na nga katuigan sa kaugalingon niyang parlor kaniadto nga nahimutang sa may Casuntingan, Mandaue.

Didto, naandan niyang mo-rebond, mo-color ug moputol og mga buhok.

Hangtud sa padayun niyang pagpanikaysikay sa maong salon nga iyang gidumala, daghan ang nanginahanglan sa iyang serbisyo sa pag -make up.

Sa pagsugod pa lang niya niini, iyang giangkon nga dili siya ingun ana ka hanas.

Nabaid lamang ang mao niya nga talento samtang nagdagan ang panahon.

Ang panganlan ni  Donjie maoy naglawig sa dihang nihimo og survey ang Banat News Hugyaw alang sa labing ilado nga make-up artist sa district 1 sa Probinsya sa Sugbo.

Ug tuod man, gikan sa pagka-beautician, mas ni -focus na siya karon isip make up artist sanglit dinhi man siya mikita og dako ug daghan sab ang nakamatikod sa kaanindot niyang mangarte sa mga dagway.

Suma total, kapin na sa 15  ka tuig nga nahimong make up artist si Donjie.

Matud niya, dili niya malimtan ang labing unang wedding event nga iyang giserbisyuhan isip make up artist.

Konsehal  sa ilang lungsod ang iyang gipaanyag ug dako ang iyang kalipay nga nakauyon kaayo  ang  kliyente sa iyang agi ug kanunay na siyang i- refer niini.

Ang maong higayun sab maoy nagbukas sa oportunidad arun managhan pa ang iyang mga kliyente labi na sa wedding events.

Giangkon niya nga bugtong ang iyang mga kasinatian maoy nagbaid kaniya sa pagkahimugso sa “Donjie” nga maoy nailang make up artist sa ilang lugar.

Mapasigarbuhon sab niyang gipaambit nga kadaghanan sa iyang mga kliyente mao ang mga asawa sa politiko.

Mapasigarbuhon sab niyang gipaambit nga naka -make up na siya sa artistang si Mylene Dizon.

Ubay ubay na sab nga mga kasinatian ang dili  niya malimtan nga maoy naghatag niya og  dakong pagtulun-an isip make up artist.

“Challenging kaayo katung dunay   magpa make-up nga  bride nga ni- contact nako  one hour sa dili pa ang iyang call time sa church. Grabe ka-stressful. Naka suway gyud ko ana kay ang bride wala tungaha sa iyang make-up artist. Mao to akoy ni-rescue. Maayo gani kay nahuman ra nako ang make up in just 30 minutes nga nindot gihapon ang resulta,” saysay pa niya.

Usa sa iyang mga inspirasyon matud pa mao ang iyang mga kliyente nga magbalik balik ug magpangita gyud sa iyang serbisyo.

Dako sab niyang kalipay sa panahong i-recommend siya niini.

Nabatyagan ni Donjie nga in demand na gyud siya nga pagka make up artist sa dihang left and right na ang iyang pagbiyahe sa mga lagyung dapit arun lang maka-make up sa mga kliyente nga todo pangita sa talagsaong magic sa iyang mga kamot.

Dakong tabang alang kang Donjie ang iyang pagka make up artist sanglit matud niya nakapondar siya og mga gamit sa iyang panimalay ug nakatabang sab siya sa mga panginahanglanon sa iyang mga igsuon.

Ang maong propesyun sab maoy rason kung nganong nagkasaka ang mga tawong nahimo niyang higala.

“Ang gusto ra nako mahinumduman ko sa akong clients nga dili lang kay sa gibayran ko nila, ma-feel sab gyud pod ko nila sa kung unsay ilang gusto ma achieve labi na sa ilang kasal. Mahinumduman  gyud ko nila  kay  dili  man gyud kaayo ko motigbas sa bayad. Kung unsa ray maabot sa budget, okay ra ko kay naa man gyuy client nga di kaayo bongga. Pero okay  ra kay gawas nga makakwarta ko,ganahan sad gyud kaayo ko aning trabahoa. Malipay ko basta maka make-up ko. Feeling nako mura kog dili kapuyun labi na kanang madungog nimo nga ganahan kaayo sila sa imong trabaho, paambit pa ni Donjie.

Siyempre sa kadugay na  sa maong propesyon, duna pud siya’y mga kaagi nga dili gyud niya malimtan  kung siya gyud ang nakasaksi.

“Dili nako malimtan katung dihay wedding nga wala muabot ang groom kay na disgrasya. Ug diha pod ko’y civil wedding nga naay mikalit og abot nagdala og pulis kay asawa kuno siya sa lalaki. Liki kaayo. Layas gyud dayun mi. Maayo gani kay nabayran na mi,” tsika pa ni  Donjie.

Dili malikayan ang mga pagsulay sa kinabuhi, apan positibo si Donjie sa tanan niyang gibuhat aron mahimong tulin  ang iyang mga gimbuhaton.