Dingdong nagpada’g suwat sa Probinsyano
CEBU, Philippines — Pinaagi sa Facebook post kagahapon, August 13, gipahibalo ni Dingdong Dantes nga gipadalhan na niya og suwat ang production team sa seryeng Ang Probinsyano gumikan sa pagamit niini sa hulagway sa iyang pamilya nga wala’y pananghid.
Nasagmuyo pag-ayo si Dingdong sa gibuhat sa production team sa maong serye.
“Courtesy and fair practice must always be observed especially in an established industry like ours.But whether or not it is done within the entertainment sector, we should always be reminded of the basic etiquette for online photo use and sharing that includes asking permission and/or citing sources,” tipik sa post ni Dingdong.
Nasayran nga makaduha ka higayon nga nagamit sa Ang Probinsyano ang hulagway sa iyang pamilya.
Sa August 8, 2018 episode sa maong teleserye, makita si Alice Dixson (Catherine Cabrera) nga naglingkod kilid sa frame sa wedding photo nila ni Edu Manzano (isip Vice President Lucas Cabrera). Nabantayan kini sa DongYanatics nga ang original photo niini gikuha gikan sa kasal nila ni Dingdong ug Marian Rivera niadtong December 30, 2015 apan gi-edit kini og giilisdan sa nawong nila ni Edu ug Alice.
Samtang niadtong November 9, 2017 episode sa Ang Probinsyano, dunay gipakita nga hulagway sila si Joko Diaz ug Mickey Ferriols nga dunay gikugos nga bata.
Nasuta sa DongYanatics nga ang original photo niini, kuha sa bunyag sa anak nila ni Dingdong ug Marian nga si Maria Letizia Dantes. Gi-edit ang maong hulagway, gipulihan kini sa nawong nila ni Joko ug Mickey apan gipabilin lang ang nawong ni Letizia.
“I do hope that this won’t happen again to anyone,” dugang mensahe ni Dingdong.
- Latest