The First Sinulog Idol
Preciosa L. Bacalso (Banat) - August 13, 2018 - 12:00am

CEBU, Philippines — Ang grasya ug ang mga dakong kahigayunan sama lang kini sa uwan nga kalit nga mobunok dinhi sa yuta. Kini nga matang sa uwan, mao kini ang ginatawag nga ‘blessing in disguise’ nga bisan pa man nga bahaon ug lapukon ang gisubay nga dalan apan kun buligan kini og pagpaningkamot ug pangayo og pagiya sa Kahitas-an, mahimo nga maangkon ang mabulukon nga dagan sa kinabuhi.

Ingon niini ang paghulagway sa kinabuhi sa Cebu’s Maoy Queen nga si Jacky Chang.

Ang Fil-Korean nga singer maoy labing una nga nakaangkon sa titulo nga Sinulog Idol.

Nakuha niya ang maong titulo niadtong 2010  nga maoy  sinugdanan sa maayong dagan sa iyang karera.

Gipabuhagay ni Jacky sa Banat News Hugyaw nga wala siya magdahom nga human sa iyang pagsalmot sa Sinulog Idol, mao na ang sinugdanan aron mutatak sa kalibutan sa industriya sa musika dinhi sa Sugbo.

 “Pag-apil nako og Sinulog Idol, as in raw pa kaayo ko. Tanan nakong learnings kay gikan sa Sinulog Idol. Unlike sa akong mga kauban ato nga season nga hasa na kaayo kay mangantahay na gyud ug bisan ako sa akong kaugalingon kay dili gyud ko makakuha sa mga techniques nila nga nakat-unan nila sa ilang experiences sa ilang pag-apil og mga contests”, tug-an pa ni Jacky.

Gawas sa school competitions, ang Little Big Star Cebu lang ang iyang naapilan nga mga contest una pa siya nga nakahukom nga moapil sa Sinulog Idol.

Sa edad nga 12 anyos, nisalmot siya sa  maong prestihiyosong kompetisyon sa telebisyon  niadtong 2006.

Human sa tulo ka tuig, miapil siya sa Sinulog Idol tungod sa imbitasyon sa anhing kawani sa munisipyo didto sa Liloan nga giila nga si “Sir Vic”.

“Ako gi-inform si Sir Vic nga ma-late ko kay ting-exam man to namo. Nagcut-off na gyud ang audition pero tungod ni Sir Vic nga ni-inform sa Sinulog Foundation nga naa pa’y moapas nga auditionee kay sangko gyud sa langit akong pasalamat niya”, suma pa ni Jacky.

Sa paghinumdom ni Jacky, labihan ang bunok sa uwan niadtong gabhiona nga miabot siya sa buhatan sa Sinulog Foundation aron mopaubos sa audition.

“Basa kaayo ko sa uwan ato samtang nagkanta. Nalipay ko nga bisan og late ko kay gidawat ko nila”, matud pa ni Jacky.

Sa dagan sa kompetisyon, gitataw ni Jacky nga dili sab lalim ang iyang nahiaguman gumikan kay kanunay siya nga madakpan og sakit.

“Dili gyud kondisyon akong lawas kay magsigi ko’g ubo, sip-on, maglabad akong ulo ug dali ko pagawon. Mao nga sigi ko og inum ato og salabat”, suma pa niya.

Wala magdahom si Jacky nga bisan pa man sa maong kasinatian, nakalahutay gihapon siya sa iyang mga pagpasundayag ibabaw sa entablado sa Fuente Osmeña.

“Magdala man ko ato og Divine Mercy. Didto gyud nako maghugot og lakas. Bisan sa akong mga kauban nga contestants kay ako gyud sila duolon tagsa-tagsa ug pahikapon nako sila sa Divine Mercy para dili sila makulbaan,” paambit pa niya.

Sa parte ni Jacky, kulbahinam gihapon alang kaniya  nga makatungtong og entablado gumikan kay dili gyud siya anad nga anaa sa atubangan sa nagpundok nga tawo .

   “Mangurog gyud ko samot na pag-contest sa Sinulog Idol kay dili gyud ko anad og contest. Dili ko anad nga makakita og mga bag-o nga nawong nga maminaw nako pero ig tunga-tunga na sa kanta kay mawala na siya. After sa akong performance kay magkiat na dayon ko”, asoy pa niya.

Dako og natabang ang Sinulog Idol sa paghulma sa pagkatawo ni Jacky. Hangtud karon, mapaubsanon siya nga mipasigarbo nga daghan sa mga maayo nga mangantahay sa Sugbo naggikan sa Sinulog Idol tungod kay sa maong kompetisyon mohulma gyud kini sa mga katakus sa matag usa ka mga contestant aron mamahimong maayo nga performer.

Sa maong kompetisyon sab magsugod ang maayong kapalaran sa mga singer nga gusto sab gyud nga molambo ang ilang karera. Sama niya nga human sa Sinulog Idol, giuwanan sab siya og mga maanindot nga mga oportunidad.

Sa samang tuig nga siya midaog isip Sinulog Idol,  nahibalag niya ang inila nga talent manager nga si Mario Colmenares.

Gani, sa iyang pagpasilong ngadto kang Mario, nalakip siya sa musical serye sa Popstar Royalty nga si Sarah Geronimo nga “Idol” nga miere niadtong Septiyembre 2010.

Wala na niya masundi ang pag-arte atubangan sa kamera apan sa pag-uli niya og balik dinhi sa Sugbo, gipadayon niya ang iyang pag-arte pinaagi sa pagsalmot sa mga theatre play dinhi sa Sugbo.

Gawas niana, wala kalimti ni Jacky ang iyang pagtungha ug gipadayon kini niya apan hangtud karon wala pa siya makalampus gumikan kay ang iyang gitinguha nga kurso nga medicine mao gyud ang iyang gusto nga lampuson. Pipila na ka kurso ang iyang nasudlan apan wala kini matapos tungod sa mga kakulian.

Dugang pa nga dili gyud mahimo nga biyaan ug hikalimtan ni Jacky ang musika ug ang pagkanta gumikan kay nakita niya nga nakasumpay na kini sa iyang  kinabuhi.

“Ganahan man gyud ko nga mokanta. Halos tanan nako nga buhaton kay kinahanglan nga naay music. Thankful pud ko nga nahatagan ko og break nga makakanta og inato nga kanta nga makasabot ug maka-relate ang tanan”, saysay pa niya.

Siya ang  nagkanta sa “Pero Atik Ra”, “Puhon”, “Sinsilyo” “Worth It Ang Tanan” ug cover niya sa “Hahahasula” ug  gipasalig ni Jacky nga aduna pay angay nga atangan nga mga awit nga iyang ihalad alang sa tanan karong tuiga.

Dakong pasalamat ni Jacky nga naingon niini ang dagan sa iyang kinabuhi tungod sa Sinulog Idol gumikan kay kining tanan nagsugod lang gyud kini sa dihang nalakip siya sa maong kompetisyon ug tungod sab kini sa mga nagpaluyo kaniya.

JACKY CHANG
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with