Nangita sa mga polis napatay

CEBU, Philippines —  Usa ka lalaking giingong nangita sa mga polis nga nitumbok kaniyang suspek sa pagpatay sa magtiayon niadtong tuig 2016 misulong sa police station sa Danao ug nisuway pagpusil sa mga polis niadtong Lunes sa gabii.

Ang maong lalaki giila nga si Jerandy Montes, kinsa giingong nagsuot og uniporme sa militar dihang miadto sa police station alas 11:30 sa gabii niadtong Lunes ug gipangita silang Senior Police Officer 1 Renante Manulat, Police Officer 2 Phil Restauro, ug Police Officer 2 Mark Anthony Mata.

Ang deputy chief sa Danao Police Station nga si Police Chief Inspector Cesar Misola mibutyag sa Banat News nga nagtuo ang desk officer nga miyembro sa Armadong Kusog sa Pilipinas ang suspek.

Apan wala diha ang iyang gipangitang mga polis maong mibiya usab dayon ang maong lalaki, apan pagkatungang gabii, mibalik kini sa police station ug gipangita gihapon ang tulo ka polis hinungdan nga naalarma na sila.

Ang tulo ka polis gituohan sa suspetsado nga maoy naggukod kaniya human siya gipasanginlan nga mipatay sa magtiayong Manulat niadtong tuig 2016.

“Namukhaan niya ang isa sa mga polis (si Restauro) na siyang lumabas at eksaktong tinawag din ito ng kasama sa pangalan. Kaya nakumpirma ng suspect na isa siya (Restauro) na hinanap at agad bumunot ng baril at nagpaputok sa ating polis mabuti na lang at hindi natamaan,” si Misola miingon.

Dihadiha miibot usab og armas ang mga polis ug nahitabo ang pinusilay nga nakaingon sa kamatayon ni Montes.

“May natanggap nga kaming mga reports na marami na siyang napatay pero walang naglakas-loob na magsalita kasi ang mga tao doon takot sa kanya,” butyag ni Misola.

Adunay himuong lawom nga imbestigasyon ang kapolisan bahin sa maong hitabo ug pag-ila sa background sa maong suspek.

Nakuha gikan sa posisyon sa suspetsado ang kalibre .45 nga armas samtang ipaubos og paraffin test ang maong mga polis nga nalambigit.

 “Under investigation sila (duha ka polis) at nag- request na din tayo ng paraffin para sa police para hindi matawag na biased ang ating gagawin na imbestigasyon. Kinukuha na din natin ang CCTV malapit sa station para makita na totoong pumasok doon ang suspect at hindi inaresto,” dugang ni Misola.

Dugang mibutyag ni Misola nga aduna silay nakuhang mga listahan sa pangalan sa mga tawo gikan kang Montes nga gituohang mga target niining patyon.

Ang maong mga pangalan nadiskobrehan nga pulos wanted persons sa Tuburan.

 “Wake up call na din ito na hindi magkampante kahit nasa police station ka at huwag patulog-tulog,” dugang pa ni Misola.  IBM (BANATNEWS)