Sinulog Idol
Preciosa L. Bacalso (Banat) - July 2, 2018 - 12:00am

CEBU, Philippines — “I believe, there is always time for everything. Pagdasig ug pagsalig sa Ginoo ang akong pirmi ginabuhat nga mutuo gyud ko that best things will truly come in His perfect time”.

Mao kini ang hugtanon nga gituohan sa ikapito nga mihupot sa titulo nga Sinulog Idol nga si Jose Thaddeus B. Roble III kinsa mas ilado karon sa pangalan isip si Jared.

Gipabuhagay sa 25 anyos nga singer nga naggikan pa sa Danao City, Cebu ang labing haum nga panultihon sa iyang kinabuhi sanglit maingon niya nga ang tanan nga nahitabo sa iyang kinabuhi miabot gyud sa tukmang panahon.

“Dili dali akong pag-apil sa Sinulog Idol,  wala ko nadawat sa first nakong audition pag 2013. Pero na bag-o gyud ang tanan pag-abot sa tuig 2016. Dili lang ang pagkasulod nako sa top 12 ang blessing na akong nadawat ato, hasta pud diay ang title nga Sinulog Idol Champion”, pagbutyag ni Jared.

Wala damha ni Jared nga maangkon niya ang maong titulo gumikan kay dili sayon ang iyang gilatas aron maangkon niya ang maong kadaogan.

“Knowing nga I still have to compete every night for about 7 days before winning the title, ako ra jud gihunahuna ato nga matarung lang nako ako performances ug makaabot lang gyud ko sa grandfinals”, suma pa niya.

Puno sa suporta si Jared  sa dihang miapil siya sa Sinulog Idol. Gikan sa iyang pamilya ug mga kahigalaan, ang numero uno sab  gyud nga misuporta kaniya mao ang long-time girlfriend nga nahimo na niya nga asawa karon nga si Lotie Mae Roble.

“Aside nga akoa gyung asawa ang nag-push  nako nga moapil, I have come to realize nga naa pa gyud koy mapakita kay tungod sab nga open-minded  ko sa tanang learnings nga pwede pa ikapamaayo na ko.  Ako pud i-prove sa akong kaugalingon nga kayanun nako tanang challenges ahead ug modaug. To represent my hometown, Danao City, and to become an Idol who can inspire”, padayag pa niya.

Sa edisyon nga gisalmutan ni Jared sa Sinulog Idol, mipatigbabaw gyud ang karakter kon diin makuha gyud niya ang kasingkasing ug atensyon sa mga tawo nga maminaw sa higayon nga mokanta na siya.

Wala magmahay si Jared sa iyang pagbalik og audition tungod kay matud pa niya, dako gyud kini og ikatabang sa pagpalambo sa iyang talento ug sa iyang kaugalingon.

“It is by far the best in terms nga ma-develop gyud mi sa among pagkanta ug pag-perform. Aside sa i-build up among talento, importante pud sa Sinulog Idol management nga ma-develop among character on how we must work with people in the industry”, esplikar pa ni Jared.

Dakong pasalamat ni Jared nga nahimo siya nga parte sa maong kompetisyon gumikan kay dinhi niya nasuwayan ang mga formal trainings aron mapalambo ang iyang katakus.

Matud pa niya nga wala niya masuwayi nga makapa-enrol og voice lessons kaniadto apan nakasuway siya og workshops pinaagi sa mga nasalmutan niya nga kompestisyon nga modalit og basic trainings ug tungod kay aktibo siya sa choir sukad pa niadtong high school siya hangtud nga nagkolehiyo na siya, matawag niya nga mao na kadto ang mga pamaagi aron mabaid ang iyang tingog sa pagkanta.

Sa pagkahinumdom ni Jared, otso anyos pa lang siya sa dihang nakitaan na siya sa iyang ginikanan nga sila si Jose Thaddeus Roble Jr. ug Rose Marie Roble nga kamao siya nga mokanta.

“Sa sige ra nakog paminaw og mga kanta sa radyo, nisulay ra ko og sunod sa ilang pagkanta hangtud sa nakakanta ko og videokehan. Nakadungog ako pamilya ug didto na sila kahibawo nga ka mao ko mokanta”, asoy pa niya.

Pito ka tuig pa ang milabay una pa misuway og salmot og kompetisyon si Jared. Sa Search for Charter Day Star sa Danao City siya una nga nakasuway nga makulbaan og maayo apan gaan sab sa iyang pamati nga mipasundayag atubangan sa bagang duot sa mga tawo.

Sukad niadto, nakauyon na siya nga mokanta atubangan sa kadaghanan tungod kay nakita sab niya nga usa kini ka lakang aron mas mohanas siya sa pagkanta.

“It's really about self-improvement. Since I really love to perform, joining singing contests for me is one way to help learn more about performing and at the same time it helps boost my confidence. Maka-motivate pud sa akoa ang feeling nga makahatag og inspirasyon ug malingaw nako ang mga tawo pinaagi sa akong pagkanta”, padayag niya.

Karon nga usa na sa tighupot si Jared  sa titulo nga Sinulog Idol, giangkon niya nga sa duha ka tuig na ang milabay, ubay-ubay na sab  gyud ang nahitabo sa iyang kinabuhi.

“I have always dreamed of performing in a big crowd and winning competitions.  Sa Sinulog Idol gyud ni siya nga nahitabo. Diri sab ko naka-experience og singing opportunities in a wider scope nga makakanta ko’g bigger crowds sa lain-laing mga dapit sa Cebu”, suma pa niya.

Maingon nga dako og epekto ang nahitabo sa iyang kinabuhi human nga giproklamar nga siya ang midaog sa maong edisyon.

“Sinulog Idol changed me in a way nga mas confident nako to perform on stage. Mas kaila na ko sa ako kaugalingon kun unsa ko mo-perform. I am able to maintain a good working relationship with talent organizers. This is also not in singing but in my life in general. I am much more grateful to God how blessed I am and I will continue to do what I do best”, padayag pa ni Jared.

Maingon sab ni Jared nga tanan nga panghitabo sa iyang kinabuhi human sa iyang kadaugan mao kadto ang gitagana nga kapalaran sa Balaang Bata nga si Señor Santo Niño ngadto kaniya.

Giisip nga dakong gasa ni Jared ang mga panghitabo sa iyang kinabuhi karon bisan og kalipay ug kasakit man kini gumikan kay matawag niya nga sama sab siya sa tipikal nga tawo nga makasinati niini.

Kining tanan nga nahitabo kang Jared karon,  gihalad kini niya sa Labaw’ng Makagagahum nga kanunay nga nasayod kon unsa ang maayo nga mahitabo sa iyang kinabuhi.

“Bisan og naay mga kapildihan ug pagsuway, pero dili jud siya nahimong babag nga makuha nako ang kadaugan. Nagpadayun lang jud ko. Padayun  magkat-on ug maampu-on sa Ginoo. I believe there is always time for everything”, pagtapos pa ni Jared.

SINULOG IDOL
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with