Nagkalawom nga gugma sa musika

CEBU, Philippines — “People will not call me by my name but instead through my title ug daghan na sab gyud ko og nadawat nga invitations para mo-perform ko sa espesyal ug dagko nga event. Makaingon ko nga Sinulog Idol really changed my life gyud especially sa akong career kay mas na-recognize nako sa mga tawo”, pagpabuhagay pa ni Aian Vincent Uba mahitungod kon giunsa pag-usab sa Sinulog Idol  sa  dihang gikumusta  sa Banat News  Hugyaw ang iyang kinabuhi.

Si Aian, kinsa nagpangidaron og 24 anyos ug nagikan pa sa Cagayan De Oro, mao ang nahimong ikawalong naghupot sa titulo sa tinuig nga Sinulog Idol. Niadtong tuig 2017 niya nalangkat ang maong titulo. Gani, kapin usa ka tuig na ang milabay human sa maong kadaugan nga iyang naangkon.

Sa pagpangumusta sa Banat News Hugyaw ni Aian niining bag-ohay lang, gibutyag ni Aian nga sa usa ka tuig human sa proklamasyon, matud pa niya nga naa gihapon sa iyang panumduman ang maong hugna kun diin siya ang midaog sa kompetisyon sa maong edisyon.

“Fresh pa gihapon siya sa akong hunahuna ug kasingkasing. Honestly wala gyud ko mag-expect nga ako ang makadaog ato nga time kay lig-on sab gyud akong mga kauban. What I did lang gyud was to enjoy and always make sure to do better and better every day ug pirminti ko atong nag-ampo to satisfy my audience”, padayag pa niya.

Sa kadaugan nga iyang naangkon, matud pa ni Aian nga daghan na ang nahitabo sa iyang kinabuhi ug  daghan na sab ang mga mibukas nga maayong oportunidad sa iyang karera ilabi na sa iyang pagpanikaysikay sa inadlaw-adlaw nga pagpanginabuhi.

“Niundang ko sa call center sa Cebu ug karon kay nagtrabaho nako as Retail Store Sales Assistant sa Globe Telecom dinhi sa amo sa Cagayan”, suma pa niya.

Maingon sab ni Aian nga mas nahimong mabulukon ang mga panghitabo sa iyang kinabuhi human sa Sinulog Idol.

Matud pa niya nga bisan og dili sagunson apan aduna na gyu’y moimbitar kaniya aron pahalaron og kanta sa mga nagkadaiyang event sama sa corporate gig, kasal, birthday, conventions ug uban pa.

Dugang pa ni Aian nga gawas nga naila na siya sa kadaghanan, mas nidaghan sab gyud ang misalig sa katakus nga iyang naangkon.

“People considered me as a good performer na gyud and I gained respect from people ug daghan na sab gyud ang mga young singer nga mangayo og tips nako. Usa sab kay people who do not pay attention nako sauna kay mao na ang mouna og panagad o pangimbitar og laag or chillin or any event para makadungog sila na mokanta ko”, suma pa niya.

Sa laing bahin, gibahin sab ni Aian nga pagkahuman sa kompetisyonn, daghan siya og gikamingawan nga mga butang ug mga tawo nga mahimo nang parte sa iyang pagpanikaysikay.

Matawag sab ni Aian nga nakapanigom na gyud siya og insakto nga mga bala sa pagpasundayag human sa pagtulun-an nga iyang nakat-unan nga gitudlo sa mga hurado nga sila si Coach Apple Abarquez, Coach Jay Unchuan ug Ryan Mark.

“Usa na ang workshops and every night nga preparation specially among mga parents sa Sinulog idol family nga usa sa nag-form sa competition nga sila si Tita Gloria, Tito Gani, Mama Roland, Te Bea, Direk Ely ug sa among amazing coaches nga sila si Coach Jay, Mommy Apple ug Sir Ryan Mark”, saysay pa ni Aian.

Gibutyag sab ni Aian nga nagpabilin sa kinauyukang bahin sa iyang kasingkasing ang mga panghitabo nga nahitabo ngadto kaniya atol sa iyang pagsalmot sa maong prestihiyosong kompetisyon.

“Mas nilawom ang akong pagmahal sa pagkanta ug ako gyud gipaniguro nga kinasingkasing ang pag-deliver nga mahatod nako ang insakto nga punto ug mensahe sa akong audience”, esplikar pa ni Aian.

Bisan paman sa iyang istado karon, aminado siya nga daghan pa siya og angayan nga makat-onan.

“I would say nga I am an ‘equipped performer’ but I know I still have a lot of things to discover. Every day, there are still things nga kinahanglan nako nga makat-unan, along the way sa akong pagkanta sa bisan asa, i-apply nako ang akong nakat-unan sa Sinulog Idol ug andam sab ko nga makat-on sa uban kay sa kini nga pamaagi, mao ni ang mohulma nako para mamahimong maayo nga singer”, padayag pa ni Aian.

Sa wala pa ni-audition  si Aian sa Sinulog,  usa  siya ka aktibo nga event singer kaniadto  sa  House of Ella  nga todo suporta sa pagsalmot niya sa maong kompetisyon.