Pacquiao inspirado sa iyang pamilya

CEBU, Philippines – Sa umaabot niyang away nga maoy modeterminar kun unsay ugma nga nagpaabot kaniya sa boksing, si Pinoy ring star Manny Pacquiao nakaangkon og dugang inspirasyon sa iyang pamilya.

Mibanat man tuod siya sa iyang pag-ensayo sud sa gym, apan si Pacquiao makita nga malipayon ug kontento gawas sa ring. Ang rason sa sanag niyang panagway mao ang iyang pamilya nga maoy usa ka lig-ong pundasyon sa iyang kusog.

"Family is everything," patik pa ni Pacquiao sa iyang Instagram uban ang hulagway sa tibuok niya pamilya.

Si Pacquiao gikatakda nga mohagit ni WBA welterweight champion Lucas Matthysse   karong Hulyo 15 didto sa Axiata Arena sa Kuala Lumpur, Malaysia. Mao kini ang una niyang pagkatkat og balik sa ring sukad siya nalangkatan sa iyang WBO welterweight title human gipilde ni Jeff Horn pinaagi sa  controversial decision dul-an sa usa ka tuig na ang milabay didto sa Brisbane, Australia.

Matud pa ni Pacquiao nga ang resulta sa maong away maoy modesider kun mopa-dayon pa ba siya og boksing o mohunong na.