Laing Pinoy moaway sa undercard ni Pacquiao
CEBU, Philippines – Gawas sa Sugboanong si Jhack Tepora sa Omega Gym, laing Pinoy nga moaway sa undercard sa away tali nilang Manny Pacquiao ug WBA welterweight champion Lucas Matthysse karong Hulyo 15 didto sa Axiata Arena sa Kuala Lumpur, Malaysia.
Siya mao si Harmonito de la Torre, ang pambato sa Sanman Boxing Gym nga atua magbase sa General Santos City. Iyang sangkaon ang walay pildeng si Yongqiang Yang sa China.
Mao kini ang ikaduhang higayon nga si De la Torre mopakita'g aksiyon sa undercard ni Pacquiao. Ang una sa dihang iyang gipatikangkang si Jason Butar-Butar sa Indonesia sa ikatulong hugna atol sa sangka nilang Pacquiao ug Brandon Rios niadtong Nobiyembre 2013 didto sa Macau.
"I am very happy to be fighting again in the undercard of Senator Pacquiao. I am training hard as I am facing an undefeated Chinese boxer," matud pa ni De la Torre ((19-1, 12KOs), kinsa naglaraw makabangon human makatilaw sa labing una niining pilde sa iyang karera sa mga kamot ni Mongolian Tugstsogt Nyambayar niadtong Nobiyembre 18, 2017 didto sa Las Vegas.
Sa laing bahin, si Tepora nga nagkupot og 21-0 nga baraha uban ang 16KOs, nagpanikad na sa labing dako nga hagit sa iyang karera diin iyang sangkaon ang Mehikanong si Edivaldo Ortega (26-1-1) alang sa WBA featherweight title.
- Latest
