Kim ug RK sa ‘ipaglaban mo’

CEBU, Philippines — Sila sila si Kim Chiu ug RK Bagatsing maoy mga bida sa anniversary episode sa “Ipaglaban Mo” karong adlawa.  Gi-shoot didto sa South Korea  ang pipila ka mga eksena niini. Ang maong episode maghisgot sa ex-lovers nga nagkasumpaki kalabot  sa kustodiya sa ilang anak.

Todo pangandam

Aktibo na si Anne Curtis sa gym ingon man usab sa pagkuha og voice lesson. Tipik kini sa iyang pagpangandam sa umaabot niya nga major concert karong August 18, 2018 sa Smart Araneta Coliseum .

Angelica napungot

Wala mahimuot si Angelica Panganiban sa iyang bashers nga kanunay mohatag og malisya sa iyang mga post sa Instagram. Suma pa sa aktres nga dili na unta  kinahanglan mo-react kon dili sila ang gipasabot sa iyang mga post.

Ibalik ang tf

Ibalik ni Erwan Heusaff sa gobyerno ang iyang talent fee isip program ambassador ug content creator sa proyekto sa Department of Tourism nga Buhay Carinderia. Gusto lang ni Erwan nga motabang sa katawhan ilabi na sa pag-promote sa mga pagkaon sa nasud. Kahinumdoman nga nakontrobersyal ang maong proyekto hinungdan nga gihunong kini. 

Makaalim sa depresyon

Giangkon ni RK Bagatsing nga nakasinati na usab siya kaniadto og depresyon ug  nakaingon gyud siya nga dako gyud og matabang ang  mga mahal niya sa kinabuhi ilabi na ang iyang pamilya ug higala aron mahuwasan siya niini.

Kylie pasok sa the cure

Hingpit na gyud ang pagbalik ni Kylie Padilla sa pag-arte.   Mosulod ang aktres  sa serye nila ni Jennylyn Mercado  ug Tom Rodriguez nga  ‘The Cure’. Kahinumdoman nga taodtaod nga nakapahuway si Kylie sa showbiz human niya gihimugso ang anak nila ni Aljur Abrenica.

Yook mobalik sa nasud

Mobalik sa nasud  ang sikat nga Korean star nga si Yook Sung-Jae   aron makighimamat sa iyang Pinoy fans karong July 13 didto sa kaulohan.  Nisikat si  Yook tungod sa seryeng Goblin ug sakop usab siya sa sikat nga K-Pop group nga BTOB.

Nabaid sa dos

Tsika pa ni Eric Quizon nga daghan gyud siya og nakat-onan sa ABS-CBN hinungdan nga nahimo siyang direktor. Nahimo siyang direktor kaniadto sa pipila ka mga episode sa Maalaala Mo Kaya, Wansapanataym,  Judy Ann Drama Special ug uban pa.

P500k  ang offer

Nakadawat og indecent proposal ang kanhi  Pinoy Boyband Superstar contestant nga si  Mark Oblea ug P500K ang offer.   Igo lang  kini gikataw-an  ni Mark.  Kontento na si Mark sa nagkasaka niya nga career.

Baby boy

Malipayong gipahibalo sa magtiayong Shamcey Supsup ug  Lloyd Lee nga lalaki ang umaabot nila nga  ikaduhang anak.  Una na nga gipahibalo sa beauty queen niadtong Mayo nga nagsabak siya.