Beautiful Friday

Kinsay di makahinumdum kang Bunny Malunda kon Pinoy Dream Academy Season 2 na ang hisgutan?

Usa siya sa mga mang -aawit nga mipatigbabaw sa maong reality singing search sa ABS-CBN kaniadto diin nakauban niya ang Sugbuanong WCOPA winner nga si Apple Abarquez.

Wa man tuod siya migawas nga palarang mananaug sa maong kompetisyon, nahatagan sab siya’g kahigayunan nga magsabasaba ang iyang pangalan sa showbiz didto sa kauluhan gamit ang iyang maanindot ug linahi nga tingog.

Hangtud nga niabot ang panahon nga nakahukom  siya nga molaylo  lang una sa spotlight ug kasikas sa showbiz ug mi-focus sa paghimo og kaugalingon niyang pamilya ug ang pagpatigbabaw niya sa iyang pagka-inahan ngadto sa nag- inusara niyang anak nga si Jether.

Apan gawas sa iyang pagka -versatile singer, may gitaguan sab diay siyang linahi nga talento.  Talento nga gipili niyang pagabairon nga mao nay nahimo niyang passion sa pagkakaron.

“Hilig na nako ang makeup since bata pa ko, mag-practice lang ko sa house ug magbasa og magazines kay wala pa’y Youtube sa una then I will try to follow the steps sa magazines. Even when I was still in college naa nay magpa makeup nako pag naay prom, debut etc. Then katong naka-join ko sa Pinoy Dream Academy unya naka enter ko sa showbiz, gipa-workshop mi para makabalo mi how to do our own makeup pag naay mga out of town shows nga walay lain maka- makeup namu,” pabuhagay pa ni Bunny sa iyang mga kasinatian sa pag-make up.

Human sa iyang pagpanimpad sa kalibutan sa showbiz, tuyo niyang gisudlan ang professional makeup artistry arun hingpit nga mahimong usa ka professional makeup artist.

Didto siya mitungha sa  Maquillage Professional School of Makeup Artistry sa Bonifacio Global City sa Manila.

Tuod man, matud ni Bunny, sa maong higayun gyud nabaid ang iyang talento sa pagmake-up.

Sukad niadto, ubay-ubay na sab nga mga personalidad ang iyang napaanyag.

Pipila niini mao silang Mrs. International 2017 Ms. Jee Candelasa, Sinulog Festival Queen Shaila Roberteta ug Ms. Philippines Earth Delegate Ms. Nathalie Roxas.

“Usa sa mga challenging kaayo nako nga experience isip makeup artist kay katong ad, campaign shoot unya 11 ladies ako gi pagwapahan ug duha ka lalaki. Kinahanglan clean ang makeup ug kinahanglan nako paspason og makeup pero dapat nice ug clean ang result kay close shots man. Pero fulfilling kaayo na bisan maka-pressure nahimo nako and na- appreciate sa client. Ang importante mahimo nako ang akong work og maayo,” saysay pa niya.

Pagka karon, in-demand ang talento ni Bunny sa pagmake up sa weddings ug print ad campaign.

Sulod sa mga nakalabay'ng panahon, ubay- ubay na sab ang misalig sa talento ni Bunny sanglit padayun man ang pagsaka sa demand sa iyang pagka make-up artist.

Matud pa niya, ang usa sa labing “fulfilling”niya nga nahimo isip makeup artist mao ang pagpahigayun niya karon og “Maquillage by Bunny Personal Makeup Workshop.”

Mapasalamaton siya tungod sa kadaghan sa misalmot sa maong event nga iyang gi -organisa.

Gani naka- second batch na siya niini ug malipayon gayud siya nga mopaambit sa katawhan sa iyang kaalam sa saktong paagi sa pag-apply og make-up.

Gawas sa iyang pagka makeup artist ug full time mom, manager sab si Bunny karon sa usa sa mga nag-unang skincare clinic sa Visayas ug Mindanao.

Sa katapusang bahin, dako ang iyang pagpasalamat sa tanan niyang mga kliyente nga misalig sa iyang artistic touch.

Mapasalamaton sab siya sa mga referral nga iyang naangkon gikan sa nahimo na niyang mga kliyente.

Apan doble sab ang pagpasalamat niya sa iyang pamilya nga wa gyuy puas sa pagsuporta kaniya ug maoy gihimo niyang numero uno nga rason sa pagpakabuhi niining kalibutana.

Q and A

BNH: Unsay dili nimo malimtan nga imong kasinatian isip usa ka makeup artist?

Bunny: Kanang mapalipay nako ang akong clients. Makakita lang ko sa ilang smile nga happy kaayo kay makita nila ilang self ra gyapon, na enhance ilang natural beauty and happy sila sa result. Makawala og kakapoy kay nakapa-happy ka sa imong client.

BNH: Sa unsang paagi nakatabang nimo og dako ang imong pagka makeup artist?

Bunny: Ma express nako akong self kay passion nako ang makeup so happy kaayo ko while doing it and after makita nako nga happy pud ang akong gimakeupan. And at the same time naga income pud ko gikan sa makeup.