Namingaw ang insta
Bisan pa man sa paglihay ni Cristine Reyes sa isyu nga matud pa buwag na sila sa iyang bana nga si Ali Khatibi, dili gihapon mahupas ang mga pagduda sanglit taod-taod na nga wala mo-post ang duha sa ilang sweet photos sa Instagram. Pabiling tak-om si Cristine sa maong isyu.
Pokwang gibabagan
Walay gihisgot nga pangalan kun kinsa ang gipasabot sa komedyante nga si Pokwang apan matud pa sa iyang tweet nga adunay nagbabag kaniya sa iyang pagbalik sa trabaho sa paghatag og kalingawan sa telebisyon. “ Gusto ko lang naman maghanap buhay ng marangal, at bilang nais ko lang din magbalik hanap buhay para sa mga anak ko, bakit parang may humaharang? naano ko ba kayo? Kaka lungkot naman”, tweet pa ni Pokwang.
Best in explanation
Gitataw ni Jenine Desiderio nga wala niya tuyua ang ma-follow niya ang aktor nga si Elmo Magalona sa Instagram. Esplikar pa ni Jenine nga dili siya ang nag-follow ug wala siya makahibalo kun kinsa. Matud pa niya nga adunay higayon nga hulaman sa iyang anak nga si Russel ang iyang cellphone mao nga basin og nasipyat sab kini og pislit. Dugang pa niya nga sa dihang nakamatikod siya nga na-follow niya ang aktor, dali niya kini nga gi-unfollow. “The unfollowing, yes, that was me because I saw it in the news & I was surprised when I checked that I was truly following him. So I unfollowed him”, tubag pa ni Jenine sa mga netizen.
Awra gi-operahan
Padayon ang pagpaayo sa child star nga si Awra Briguela human nga gipaubos og operasyon sa miaging adlaw. Ang child star nakasinati og appendicitis mao nga gikinahanglan kini nga operahan dayon. Dakong pasalamat ni Awra nga anaa sa iyang kiliran ang miyembro sa GirlTrend nga si Riva Quenery kinsa anaa gyud sa tibuok higayon atol sa iyang operasyon. Si Riva ang usa sa mga suod nga higala ni Awra sa showbiz.
Class of 2018
Mag-uban na sa usa ka pelikula ang Kapamilya teen stars nga sila si Sharlene San Pedro ug Nash Aguas. Ang maong proyekto nag-ulohan og “Class of 2018”. Nakugang si Sharlene gumikan kay nahatagan na gyud siya og higayon nga mahimong usa sa mga lead stars sa pelikula.
Jake suportado ni Jessica
Gisuportahan sa Fil-Am singer nga si Jessica Sanchez ang pagladlad ni Jake Zyrus sa tinuod nga pagkatawo niini sa publiko. Bisan pa man og nag-usab na kini og screen name, bilib gihapon si Jessica sa ka maayo mokanta ni Jake. “I can’t stop acknowledging Filipino talents out here. It’s insane! I’m proud of Jake coming out, of being himself. That’s a very hard thing to do, eyes watch you all the time. This is a real artist being himself”, suma pa ni Jessica.
Nangayo og pasaylo
Gitug-an ni Alex Gonzaga pinaagi sa iyang Twitter post nga nakita niya ang iyang kaugalingon nga “annoying” gyud siya sa iyang vlogs nga iyang gi-post kaniadto. Gani, nangayo siya og pasaylo gumikan kay wala siya’y preno sa iyang mga ipadayag nga mga pulong nga gituohan niya nga kataw-anan apan nakasakit na diay og pagbati ngadto sa uban. Kahinumdoman nga gisaway si Alex sa pipila ka netizens sa dihang ni-post siya og , “Japan sagot sa kahirapan'.”
Pinili ni Bea
Gihinganlan ni Bea Alonzo ang iyang mga gipangandoy nga mahimo niyang dinner guests. Nag-una sa listahan ang Philippine Cinema Superstar nga si Nora Aunor. Nagsunod mao ang iyang amahan nga wala pa gyud niya makita sukad pa kaniadto. Ang katapusan sa lista mao ang Canadian actor nga si Ryan Gosling. Matud pa ni Bea nga napili kini niyang tulo gumikan kay mao kini ang iyang mga gihangad nga mga tawo sa iyang kinabuhi. Mao sab kini ang mga nahimo niya nga motibasyon nga buhaton pagtarong ang iyang trabaho.
Nakalampos gyud
Nag-trending karon sa internet ang hulagway sa Goin’ Bulilit alumna nga si John Manalo ug ang girlfriend niini nga usa ka model nga si Erika Rabara. Patok ang ilang hulagway tungod sa nagpahipi nga mensahe kabahin sa ilang naagian sa ilang relasyon. Nag-umol ang maong mensahe nga daghan ang wala kauyon sa ilang relasyon tungod kay babag lang kini sa paglampos sa ilang pagtungha apan wala gyud mosaler ang maong panglantaw sa ilang mga kritiko.
- Latest