Nagpatukod og balay

Gipakita ni Julia Barretto sa social media ang gipatukod niyang balay nga pila na ka buwan nga gihimo ug gikatakdang mahuman kini karong Oktobre. "That’s me sitting on the 1st floor of my almost finished home. It’s getting real,"post pa sa aktres.

Gimingaw sa SOP

Gimingaw na matod pa ang Asia's Songbird Regine Velasquez sa kanhi variety show sa GMA-7 nga SOP ug sa mga kauban niining hosts nga silang Janno Gibbs, Jaya ug sa banang si Ogie Alcasid. Nag-post ang singer og hulagway sa Twitter kauban ang kanhi Kapuso stars. Duna’y follower ni Regine ang nisugyot nga mas maayo nga mobalhin siya sa ABS-CBN aron makatrabaho niya og balik ang nahisgotang singers.

Gimingaw og minaldita

Gibutyag sa aktres nga si Gladys Reyes nga malipayon siya nga kontrabida na gyud iyang role sa bag-ong serye sa GMA-7 nga Inday Will Always Love You. Gimingaw na matod pa siya og kontrabida roles sanglit buotan man iyang karakter sa mga nagsunod niyang mga proyekto.

Mobisita sa nasud

Gikatakdang motikang sa nasud karong Hulyo ang Game of Thrones stars nga silang Jessica Henwick ug Finn Jones ug molugwa sa  upcoming AsiaPOP Comicon didto sa SMX Convention Center. Daghan ang naghinam-hinam nila nga fans nga  makita sa personal ilang mga idolo.

Wala’y kahadlok

Giasoy sa aktres nga si Aiko Melendez nga dili matod pa siya mahadlok nga kaslon sa ikatulong higayon bisan pa man nga kapila na napakyas iyang kaminyuon. Kaduha na gikasal si Aiko, una ngadto ni Jomari Yllana ug ikaduha mao si  Martin Jickain. Karelasyon sa aktres karon mao si Subic, Zambales Mayor Jay Khonghun.

Cesar mi-resign

Nikanaog isip Tourism Promotions Board chief ang aktor nga si Cesar Montano ug wala kini mitino sa rason sa pagkanaog sa pwesto. Kasamtangan nga nag-atubang og isyu ang aktor kabahin sa gipahigayon niining proyekto ubos sa Department of Tourism.

Mopahuway sa EB

Mobiya una sa iyang trabaho isip host sa Eat Bulaga! si Senator Tito Sotto, kini aron maka-focus sa trabaho niini isip bag-ong Senate President. Pila na ka dekadang host si Sotto sa nahisgutang noontime show kauban silang Joey de Leon ug Vic Sotto.

Mipahuway sa social media

Kasamtangang niundang una sa paggamit sa social media ang aktor nga si Christian Bables kay dili kini gusto makasinati og bashing gikan sa netizens. Busy karon ang aktor sa shooting sa short film nga A Love Story in the Time of HIV diin usa gihapon ka gay role iyang gidala.

Nangandam na

Gipaambit sa aktres nga si Megan Young nga usa sa iyang pagpangandam sa dili pa magbuntis kay mao ang pagsige og work-out o pag-ehersisyo. Miasoy sab ang aktres nga magminyo na siya sa edad nga 30 anyos. "I need to prepare my body and my health. Kaya lagi n’yo akong nakikita na nagwo-work-out,asoy pa sa aktres.

Dawaton na lang gyud

Gitataw ni Janella Salvador nga padayon ang pagsuporta nila ni Elmo Magalona sa tagsa-tagsa nila nga mga career bisan pa man nga ipares sila og laing artista.  Suma pa ni Janella , nga dili unta sila andam  niini kaniadto, apan wala sila’y mahimo sanglit tipik man kini sa ilang trabaho."We were kind of hesitant at first. We didn't want of course to go our separate ways in terms of work," paambit pa sa aktres.

Panahom ni Bea

Tsika pa ni Bea Alonzo nga kon mahigugma gani, kinahanglan gyud nga iandam daan ang kaugalingon sa posibleng mahitabo. Kasagaran, mag-agi gyud og kasakit kon mahigugma ang usa ka tawo. Depende kini kon giunsa paghupot ang usa ka relasyon.