Si Inday ug ang Sugbo

CEBU, Philippines — Gisugdan na sa GMA Network niadtong Lunes sa gabii ang pagpakatap sa kilig lukop nasud human nga mi-ere ang gibidahang rom-com series nila ni Barbie Forteza ug Derrick Monasterio isip si Happylou Magtibay ug Patrick Altamira sa Inday Will Always Love You.

Una pa gisugdan ang maong serye, mibisita dinhi sa Sugbo ang mga bida niini kauban ang mga Bisaya nga Kapuso stars nga sila si  Manilyn Reynes ug Romeo Librada kinsa mas naila karon isip Super Tekla ug nihatag og kalingawan sa mga Sugbuanon.

Sa pagpakighinabi sa E-Group nila ni Barbie ug Derrick, giangkon sa duha nga nalingaw sila sa ilang pag-shoot sa mga nagkadaiyang dapit sa Sugbo ilabi na didto sa isla sa Bantayan.

“It was the only beach where in I really get to enjoy. Hindi talaga ako mahilig sa beach kasi I don’t like the sun that much. Pero ang ganda talaga du’n eh. Ang sobrang linis at very underrated na siya yung bagong Boracay. Mas better siya sa ibang beaches na napuntahan ko”, padayag pa ni Derrick.

Dugang pa ni Derrick nga kun makahigayon siya og tikang pagbalik sa Cebu, libuton niya ang mga nagkadaiyang sikat nga destinasyon tungod kay mao kini ang anaa karon sa iyang bucket list.

Sa bahin ni Barbie, mas nalingaw siya ilabi na sa mga pagkaon nga iyang natilawan dinhi lang sa Cebu ug sa mga tawo nga iyang nahimamat.

“Kasi, warm talaga ang pagtanggap nila sa amin, sa set pa lang, ramdam mo na nakasuporta sila kasi kahit ang init na, andun pa rin sila nakaabang sila”, sigon pa ni Barbie.

Dugang pa sa duha nga sa maong serye lang sila una nga nakat-on nga molitok sa pinulungang binisaya.

Bisan og bag-o alang kanila ang maong pinulungan, matud pa ni Derrick, naglisod siya sa paglitok niini mao nga nagpatabang na lamang siya sa iyang mga higala nga mga bisdak ug kun dinalian na kini, mao na sab ang higayon nga magpatabang na siya og pa-translate sa Google Translate o manampit sab siya sa mga kauban niya sa set sa kadtong mga kamao molitok ug mopasabot kaniya sa mga pulong nga nalakip sa iyang eksena.

“Kasi mahirap talaga siya, yung tone, yung accent. Akala ko yung pagkaintindi ko sa word ay yun na yun kaso iba pala talaga siya kaya nagpapatulong talaga ako”, suma pa ni Derrick.

Bisan pa niana, wala sab magkuwang sa pagtudlo ang mga hanas na nga molitok sa pinulungan nga si Manilyn .

“Since we are in Cebu, there’s a big chance nga mo-istorya gyud mi og binisaya. Kay mga tagalog man ni akong mga “anak” [Barbie ug Derrick], tudluan lang sab nako sila og binisaya kay kinahanglan man gyud nga sagulan ang among script og binisaya”, suma pa ni Manilyn.

Lumad nga taga Cebu si Manilyn. Napu ka tuig siya nga nagpuyo sa Martires kauban ang iyang pamilya una pa sila mibalik sa pagpamalhin sa Manila aron sudlon ang kalibutan sa showbiz.

Sa Tejero Elementary school ug Universtity of Southern Philippines Mabini siya nagtungha kaniadto.

Dakong kalipay ni Manilyn ang malakip sa maong serye gumikan kay kanunay siya nga maghinam-hinam nga makauban si Barbie sa usa ka proyekto.

“Dili gyud ko mobalibad kung si Barbie na akong kauban kay wala man gud koy anak nga babaye, puro lalaki. Kani man gu’ng mga actress sa amo [Kapuso Network], giisip na nako sila nga mga anak sab”, suma pa ni Manilyn.

Dugang pa nga gusto sab siya sa karakter nga iyang gidala tungod kay siya mismo ang inahan ni Barbie nga si Marta.

Gikalipay sab ni Manilyn ang makatrabaho sa unang higayon si Super Tekla tungod kay matud pa niya, malingaw gyud siya sa mga pagabuhaton ni Tekla sa mga eksena niini.

Gitug-an ni Tekla nga sabaan siya nga higala ni Happylou nga si Kimberlou ug matud pa niya nga maukay gyud ang tanan sa iyang paglugwa sa mga eksena sa maong serye tungod kay aduna siya’y nagkadaiyang fashion statement nga buhaton sab niya sa unang higayon.

Bisan pa man og naglisod siya sa iyang unang pagkalakip sa major series,  naninguha siya nga mahatag niya ang tanan nga gikinahanglan sa maong proyekto tungod kay magsilbi kini nga unang ang-ang aron molungtad sa industrya.

“Miraculous man gud kaayo ni ang nahitabo sa akoa karon. Wala ko magdahom nga maapil ko ani nga proyekto bitaw kay unsa ra gud ko sa una. Mao nga ihatag nako kun unsa akong mabuhat kay para malingaw ang tanan ug gusto sab ko ani nga proyekto kay kauban na nako akong mga giidolo ug nindot sab gyud ang istorya”, esplikar ni Tekla.

Nagmalaumon si Barbie nga unta suportahan kanunay ang ilang serye ilabi na sa mga Sugbuanon.

Magdagan ang istorya sa Inday Will Always Love You sa pagpakita sa kaanindot sa Sugbo lakip na sab ang kultura nga atong naandan.

Ang mga sagad nga destinasyon nga makita sa kadaghanan sa maong serye mao ang isla sa Bantayan, Sirao Garden, Temple of Leah, 10,000 Roses Café sa Cordova ug uban pa nga angayan nga atangan sa mga Kapuso.