Embracing Her Potentials

CEBU, Philippines — Kinahanglan nga sensitibo kitang tanan sa bation sa uban gumikan kay mao kini ang pamaagi aron dili makapanakit sa pagbati sa uban ug aron usab nga makadawat kita og respeto ngadto sa atong isig katawo.

Sa kaagi sa Sinulog Idol finalist Season 9 nga si Frianne Mackenzie Omega kinsa mas ilado karon sa iyang alyas nga Aki, ingon nga miagi siya og mga pagtamay gikan sa iyang isigkatawo sa kaniadtong bata pa lang siya. Ang maong kasinatian nakahatag kini og pagduda sa iyang kaugalingon.

“I started doubting myself when I was bullied in Grade 3 tungod kay akong mga classmates kay mura og masina sila nako ug nakadungog ko nga niingon sila nga bati ko og tingog. With just those words, naabot siya sa depression”, asoy pa ni Aki.

Tungod sa maong panghitabo, nawad-an sab siya og gana nga mopakita sa iyang katakus sa pagkanta. Matud pa ni Aki nga naapektaran gyud siya pag-ayo sa mga pamulong nga gipangbatbat sa mga tawo batok kaniya.

“Maka-affect jod baya atong words and actions in any way. I love to learn and I was very good in school pero one day naabot sa point nga I told my grandparents nga dili nako ganahan moeskwela. Sakit sab sa akong buot nga nakapaguol ko nila tungod lang sa istorya sa mga tawo”, suma pa ni Aki.

Bisan og wala siya’y gana nga mopadayon og eskwela, naninguha gihapon si Aki nga makalahutay sa maong kasinatian tungod kay nakasabot ra sab siya nga kon magpadala siya sa mga istorya sa uban, alkansi gyud siya gumikan kay gihatagan niya og higayon nga mas moubos ang pagtan-aw sa mga tawo kaniya.

“Sa akong pagpadayon og eskwela, blessing kaayo nga makaila ang mga tawo nga nitratar nako as part of the family. As I gain acceptance, nibalik akong gana sa pagkanta and that was pag-3rd Year high school nako. That was the first time I sang in front of the crowd after 6 years”, saysay pa ni Aki.

Sa pagpakabuhi ni Aki sa kalibutan, nagtubo siya sa iyang mga apohan nga sila si Frasco ug Minerva Omega.

“Since birth, naa gyud mi nag- stay ni Mama Marjourie sa balay nila lolo. Hangtod naabot ang time nga nagbuwag akong parents ug naka-decide akong grandparents nga adto lang ko nila for my safety”, suma pa ni Aki.

Bisan pa man og wala niya makauban ang iyang amahan apan wala magkuwang ang iyang Lolo Frasco sa pagpuno sa paghatag og pagmahal sama sa usa ka amahan ngadto kaniya.

Dili niya mahikalimtan ang pamaagi sa pagpadako kaniya sa iyang apuhan gumikan kay maingon niya nga mao kini ang usa sa mitudlo kaniya sa pagkanta gawas sa iyang inahan.

Matawag sab ni Aki nga ang iyang lolo mao ang number one  mentor ug supporter kaniya tungod kay mao gyud kini ang modasig kaniya nga ipakita kon unsa ang gasa nga iyang giliwatan niini.

“Di man gyud ko kontesera. But I remembered what my grandpa told me before he died, “Sige na. Go na.” Then naka-decide ko to start working hard for my dreams and to gradually accept whatever obstacles I should face. And competitions are one of those obstacles that will help an artist grow”, suma pa niya.

Niadtong miaging tuig lang, gisugdan niya kini sa pa-apil sa Wishcovery sa Wish 107.5 diin sa unang pagsalang pa niya og mga singing contest, nalakip na siya sa mga nahimong pre-qualifiers  ug ipada sa Manila.

Bisan og nagduha-duha gihapon siya nga moapil  sa  mga  audition apan gitukmod gihapon niya ang iyang kaugalingon nga mosuway sa pag-apil tungod kay gusto sab niya nga tumanon ang usa sa mga pangandoy sa iyang anhing apohan nga makatungtong siya sa lapad nga entablado nga adunay magpundok nga mga tawo nga maminaw kaniya.

Human niadto, wala niya damha nga masundan gyud ang pagsalmot niya  og  kompetisyon kung diin nakabasa siya sa  post sa Sinulog Idol Season 8 runner-up nga si Mitsuko Cabillada.

“Niapil lang gyud bitaw ko’g kalit because I want to learn. Pero pag second round nako naka-realize nga I really want to bring out the best in me,” matud pa niya.

Pagbalik lantaw pa ni Aki, dili niya mahikalimtan ang iyang mga nahimong kaagi sa kompetisyon gumikan kay sa tumang kahadlok niya, wala niya abta ang mga taas nga nota sa kanta nga The Climb.

“Dakilang takot ko ato that time. Makita gyud nako nga everyone in the room was disappointed. Nakahilak ko kay wala ko naanad mukanta og high notes and disappointed pod ko's akong kaugalingon kay magsige ko’g doubt”, suma pa ni Aki.

Apan sa pagpadayon sa iyang kapalaran sa Sinulog Idol, naibanan na ang iyang pagduhaduha sa iyang kaugalingon tungod kay gibaid ang iyang tingog pinaagi sa pagpaubos og workshop nila ni Coach Apple Abarquez ug Coach Jay Unchuan.

“After all, nahimo nakong motivation ang ilang comment pag-audition nga ‘We all know that you can sing. Pero karon ra ka kahibaw nga YOU CAN REALLY SING no?’ Didto na ko nagsugod og change for the better”, matud pa ni Aki.

“Without the Sinulog Idol, I wouldn’t be more sensitive in dealing and catching my audience’s mood. This show helped me gain much experiences, learnings and memories sa pagkanta. Now, I rarely doubt myself all”, panapos pa ni Aki.