Uwan wala kabalda
Junas D. Flores (Banat) - April 27, 2018 - 12:00am

CEBU, Philippines – Usa kini ka tinuig nga kalihukan sa Basilica  diin ang Sugbuanong composers mopadungog sa ilang sinulat nga mga awit nga gihalad alang sa Batang Hesus.

Ang Huniño gilangkuban sa tulo ka mga nagkalain-laing kategoriya nga parte sa Santos nga Misa, ang Entrance Song, Communion Song ug Recessional/Final Song. Ang maong mga awit maoy kantahon atol sa misa sa basilica ilabi na sa  matag Biyernes.

Sigon pa sa rector sa Basilica Minore del Sto. Niño de Cebu Rev. Fr. Pacifico Nojara, ang Huniño dili lang yano nga koleksyon sa mga awit, kundili nagpakita kini sa atong gugma ngadto sa Batang Hesus.

“Adunay nagsulti nga, every song has a soul, maong para nako Huniño is not just a mere collection of pieces of music, but also a soul that echoes the rhythm of love, goodness and prayer to our dearest Sto. Niño de Cebu,” niya pa.

Ang criteria sa pagpili og mananaog mao ang mosunod:musicality 40% lyrics 40% originality 20%.

Gideklara niadtong gabhiuna ang tulo ka grand winners sa nagkalain-laing kategoriya ug ang nidaog  sa entrance song category mao ang entry no. 2 nga Sto Niño, Our Inspiration nga gi-compose ni Russel Alegado ug gi-interpret ni Niña Brigette Cabigas.

Gipaambit sa composer nga si Russel nga ikasiyam na niyang apil sa Huniño ug ikaduha na niya kining kadaugan.

“Grateful kaayo ko, kay wala gyud ko nag-expect kay nindot man gud ang tanang entries, ang amo basta matarong lang gyud og perform okay na,” sigon pa niini kinsa niasoy nga tunga lang sa adlaw niya gisuwat ang maong kanta.

“If mohimo ko og kanta ni Sto. Niño, siguradoon gyud nako nga singable, bahala na nga dili ko makadaog,”dugang pa niya.

Samtang gituboy isip grand winner sa communion song category ang entry no. 5 nga Love of A Child nga gi-compose ni Jundel Bacalso ug gi-interpret ni Francis Niño Colipano.

Sigon pa sa composer nga si Jundel, walo ka tuig na siyang niapil sa maong kompetisyon ug karon lang gyud siya nakadaog.

“Worth it ang sige nako’g try, wala gyud ko na-discourage bisan wala ko nakadaog sa una,” paambit pa sa composer.

Nidaog sa final song category ang entry no. 10  nga “Pit Senyor Matag Adlaw” nga  komposisyon ni Alberto Cabag Jr. Midaog usab isip Best Interpreter silang Rogelle Bandigas, Cheryl Racaza, Marijune Torreon, Alberto Cabag Jr., ug ang composer mismo sa  maong entry.

“Mag-ampo ta matag-adlaw. Hinaot unta nga makita sa atong lihok ug pulong ang kalinaw ug gugma sa Diyos,” ni Cabag pa kalabot sa  mensahe sa gisuwat niya nga kanta.

Usa ra ka adlaw niyang gisuwat ang maong kanta busa malipayon siya nga nauyonan kini.

Dugang niya, sige na siya og tabang sa iyang mga higala sa pagsulat og kanta para sa mga song writing competition apan karon ra nahitabo nga siya mismo ang niapil.

“Naabot ang time nga suwayan nako ang pag-apil og contest. Wala nako damha nga makadaog dayon ko,” matud pa niya.

Ang “Pit Senyor Matag Adlaw” maoy nakakuha sa award nga  Best Video, samtang awit nga  Isangyaw ko mao ang nakakuha sa People’s Choice Award.

Lakip sa mga hurado mao silang Rev. Fr. Alladin Luzon, Rev. Fr. Noel Cogasa, Prof. Robeto Del Rosario, Rev. Fr. Jonas Mejares, ug ang chairman sa board of judges nga si Rev. Fr. Vicente Amplayo.

Special guest niadtong gabhiona si Yessha dela Calzada nga produkto sa D' Voice Kids ubos sa Team Lea Salonga .

Makabungog  nga pakpak ang nadawat  ni Yessha gikan sa audience gumikan sa iyang pagbirit   sa  awit nga Never Enough, Shine ug Akin Ka Na Lang.

Tungod sa maong kalihokan padayon nga natabangan ang beneficiaries sa BMSN Children's Welfare Foundation.

Sa VTR, pipila ka scholars sa maong foundation ang nipadayag sa ilang testimonya kalabot sa dakong natabang nga ilang nadawat sa foundation.

Matud pa nila nga tungod sa BMSN Children's Welfare Foundation, nakapadayon gyud sila sa ilang pagtungha gani ang uban niini mga professional na. Nasayran nga ang halin sa album sa tinuig nga Hunino maoy ihatag ngadto sa nahisgutang foundation.

Gipamatud-an sa maong show nga ang padayon nga paglawig sa local music ilabi na sa mga tawo nga mahiligon kaayo sa pagsuwat og kanta.

Sila si Mary Rose Villacastin-Maghuyop ug and DJ sa MOR nga si Ric maoy hosts sa 12th Huniño  ug nipadangat usab sila og ginagmay nga pasiaw. (Uban sa report ni Sanden Anadia)

KABALDA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with