Paglikay sa sakit sa kidney

CEBU, Philippines — Ang kidney adunay dako nga nahimong kalihukan sa lawas sa usa ka tawo. Ang kidney mao ang mo-regulate sa blood volume, blood pressure, ug sa red blood cells. Mao nga dako gyud og matabang ang kidney sa maayong dagan sa sistema sa lawas sa usa ka tawo.

Adunay duha ka kidney, silang duha mag-inunungay aron mas mapamaayo ang sistema sa lawas. Kun ang usa adunay deperensya, maghago na sab ang kapares niini nga kidney. Kun masobraan na kini sa hago, inanay ra sab kini mopalyar.

Sama lang sa relasyon, dapat balanse ang trabaho ug dili mag-abusar aron magpabilin nga maayo ang dagan sa duha ka binuhat. Kun ato sab kini nga itandi sa kidney, kinahanglan nga dili abusaran nga pagkaon sa mga ginadili nga pagkaon aron mas molungtad ug dili kini magkadeperensiya.

Suma pa sa www.healtheworld.in mao kini ang angay buhaton aron maampingan ang kidney sa lawas.

• Kanunay nga moinum og tubig. Mas labing maayo nga mosunod sa walo ka baso sa usa ka adlaw.

• Dili magpugong sa ihi.

• Dili magpalabi og kaon og tam-is.

• Dili sab maayo nga sobraan ang pagkaon og parat.

• Dili palabihan ang pagkaon og karne, ilabi na ang red meat.

• Dapat insakto na ang oras sa pagkatulog. Mas labing maayo nga 8-10 ka oras ang pagkatulog.

• Motumar og vitamins nga adunay B6.

• Dili palabihan og inum og kape.

• Dili angay magsagunsun sa inom gumikan kay makadaot kini sa kidney ug sa atay.

• Ang mga tambal mao ang makahatag og alibyo sa atong mga sakit apan kon pasobraan sab kini, makahatag kini og kadaot sa kidney.

Tipik lang kini sa unsaon ang pag-amping sa atong kidney, mas labing maayo nga magmabinantayon aron mas maayo ang atong pagpakabuhi ug luwas kita sa mga sakit.