Kapamilya na si Ryza…

CEBU, Philippines — Kusog kaayo ang huhungihong nga mulayat na paingon sa ABS-CBN si Ryza Cenon, kinsa Starstruck Ultimate Winner sa GMA7 artista search kaniadto ug misikat og maayo human nahimong kontrabida sa teleseryeng “Ika-6 Na Utos” sa Kapuso network nga natapos na niadtong nilabay nga semana.

Ang istorya mao nga gitakda na matud pa nga mag-taping ni Ryza alang sa iyang guest appearance sa top rating series sa ABS-CBN nga, FPJ’s Ang Probinsyano nga gibituonan ni Coco Martin. Mao na kini ang naandan nga mahitabo sa bag-ong talent sa ABS-CBN—ang palugwaon sila sa Probinsyano.

Nasayran nga sa nilabay’ng tuig pa nibiya si Ryza sa GMA Artist Center ug nipirma og kontrata ubos sa Viva Artist Center. Hinuon, iyang gipasalig niadtong tungora nga magpabilin siya sa GMA7.

Tinubagay sa mga Rayna!

Nahu’g og nagtinubagay ug nagpadungog-dungog ang mga kanhi beauty queens ug kasamtangang rayna nga sila si Maggie Wilson, Bea Soriano, Valerie Wiegmann ug Catriona Gray.

Nagsugod ang tanan, dihang ni-tweet si Maggie nga dili siya uyon nganong si Catriona maoy gipasidunggang best in swimsuit atol sa Bb. Pilipinas pageant nga aduna pa may daghang nindot og lawas. Giuyonan kini ni Bea pinaagi sa pag-ingon nga angayan nga dili ra unta kaanyag sa nawong ang basihan alang sa maong award.

Giklaro hinuon sa duruha, nga boto sila sa kadaugan ni Catriona isip Miss Universe Philippines ug nga angayan gayud kini sa maong titulo, apan wala lang gyud sila nakauyon nga kini maoy best in swimsuit.

Dinhi nagkagubot na ang mga fans ni Catriona ug giataki sila si Bea ug Maggie hangtud nga nahimo nang personalan ang birada sa fans batok sa duha ka mga beauty queens, ug nanawagan sila ngadto kang Catriona aron badlungon ang iyang mga fans nga gihulagway nilang walay batasan.

Isip reaksyon, nag-post si Catriona sa iyang IG account ug namulong nga, “Everyone is entitled to their own opinion, let’s not be overly sensitive.” Unya nidugang siya nga dili matud pa siya makakontrola sa iyang fans, dili siya makapugong sa kun unsay ganahan ug dili nila ganahan isulti.

Taliwala niining tanan, nihangyo siya nga angayan na lang magmaya ug malipayon ang tanan inay magpaka negatibo. “More love. More POSITIVITY.” Niya pa.

Samtang, agig pagdepensa kang Catriona, ni-post si Valerie pinaagi sa iyang IG account ug nangutana nganong ang ubang mga tawo kinahanglan pang magpakauwaw sa ilang isigkatawo pinaagi sa pagtumbok sa porma sa lawas niini.

“It makes me wonder why certain people still feel the need to body-shame? Why can’t they appreciate and celebrate each other’s differences?” Nagkanayon si Valerie kinsa nigamit og hashtag nga #BEAUTYINALLSHAPESANDSIZES

Kahinumduman nga si Maggie nakoronahan isip Miss World Philippines 2007; si Bea nahimong Miss International 2013; ug si Valerie maoy Miss World Philippines 2014.