Unsaon pag-ila ang fake news?

CEBU, Philippines - Kini maoy mensahe sa segment host sa Balitang Bisdak, Cecille Quibod Castro atol sa iyang live interview sa MARKado sa Banat News Page kauban ang entertainment editor nga si Ryan Mark niadtong Sabado sa hapon.

Usa sa iyang gipaambit mao ang saktong panag-ingnan sa mga news sources ug ang labing importanteng butang sa kalibutan sa media, ang pag-ila sa fake news.

Kanunay niyang ipahinumdom sa iyang mga estudyante kaniadto nga kon ang mabasahan nilang mga article sa online site dili factual ug nagtamay-tamay og mga tawo, tataw nga dili kini balita.

“Ako gyud gisulti sa akong students, nga ayaw gyud na i-share ang fake news. Ang timailhan ana kay nag-mock siya og ubang  tawo , dili siya factual  ug wala’y basehan,” nagkanayon si Cecille, kinsa nagtudlo og mass communication subjects kaniadto sa University of San Carlos.

Usa matud pa siya sa mga tawong naguol sa epekto sa daghan kaayong mga nanggawas nga mga fake news karon.

Tambag pa ni Cecille sa kadaghanan nga una nato i-share ang mga article online, ato una kining sutaon kun tinuod ba gayud kini ug kon kinahanglan ba gayud kining i-share.

Nipaambit sab si Cecille sa iyang kasinatian kaniadtong field reporter pa lamang siya sa pagpanguha og mga balita.

Matud niya dili gyud malikayan nga adunay mga panahon nga makasugat siya og mga init og ulo nga mga news sources ug halos dili siya tinggan sa panahong mo-interview siya niini.

Pahimangno niya sa mga bag-ong media practitioners karon  nga kon ugaling makasugat sila og ingon niini nga  sources, ipasabot kini didto kanila nga importante gyud nga mapadayag ang ilang habig aron masayran sab ang ilang kaugalingong bersyon sa balita nga ilang nalambigitan.

Importante matud pa nga makuha ang matag habig sa mga tawong nalambigit sa mga balita.

Samtang  gipabuhagay usab niya  ang iyang dakong bilib sa mga tawong gihangad niya sa broadcast industry sama na lamang nilang Mel Tiangco ug Jessica Soho nga maoy gihimo niyang sumbanan sa iyang pagka- siya karon sa natad sa broadcasting.

Apan ang nakapahugyaw sa maong FB live session mao ang pagkumpisal na ni Cecille mahitungod sa iyang lovelife.

Dili na sekreto sa kadaghanan nga si Cecille naminyo ngadto ni Christopher Bautista Castro, lima ka tuig na ang nakalabay.

Gibutyag ni Cecille, una siya naminyo  sa maong lalaki nakahiagom siya og "bad break up" butang nga di na niya gusto pa nga subling mahitabo.

Hinungdan nga mao na lamang ang iyang dakong pag -ampo nga makahimamat og lalaking moseryoso kaniya hangtud na nga mapakaslan siya niini.

Tuod man sa wala  madugay, miabot gyud ang iyang gihuwat nga prince charming.

Dako sab ang iyang kalipay kay matud pa gawas nga buotan kini, gwapo pa gyud.

Matud niya, na love at first sight ang iyang bana sa dihang una kining nakakita kaniya sa telebisyon.

Didto sa Canlaon City ang iyang bana niadtong higayuna kansang may giatiman nga negosyo sa ilang pamilya, ug sa pagkakita matud pa ni Christopher kaniya, misaad ang iyang bana ngadto sa iyang uyuan nga iya gyud kining minyoan ug dalhun kini niya didto sa Canlaon.

Tuod man, ang tanan nahatagan og katumanan.

Nasayran nga 12 ka tuig na nga empleyado sa GMA-7 Cebu si Cecille diin nagsugod siya isip correspondent, nahimong reporter ug hingpit nga nahimong segment host sa Balitang Bisdak nga gidumala ni Kapusong Bobby Nalzaro.

Ang iyang paglugwa sa programang MARKado tipik sa selebrasyon sa ika -23 ka tuig nga kasumaran sa Banat News.

"Through #MARKado , I conquered my fears of being interviewed live on social media (no cuts, no takes, no rehearsals and no pre-approved questions). Only Ryan Mark of #MARKado can throw questions at me like that (both personal and professional-related questions). Including Miss U question and answer portion," si Cecille nagkanayon pinaagi sa iyang Facebook account, pipila ka oras ang nilabay human sa interview.

Natapos ang maong FB live session nga puno sa dagkong bahakhak sa katawa ug siksik sa mga pagtulun-ang kakuhaan og inspirasyon sa kinabuhi ni Cecille. (BANAT NEWS)