Mr. and Miss CF-JPIA2017

CEBU, Philippines - Pormal nang gipaila sa publiko ang 24  ka finalists  sa Mr. and Miss CF-JPIA2017 nga pasiugdahan sa Cebu Federation of Junior Philippine Institute of Accountant.

Dose ka mga kalalakin-an ug 12 ka mga kababayen-an ang magtigi sa paglangkat sa korona  sa maong indigay.

Nagikan sila sa nagkadaiyang tunghaan sa Sugbo nga adunay mga managlahing kurso sa natad sa Accounting.

  Ang maong kalihukan gipahigayon sa nagpadayong Accountancy Week sa mga tunghaan dinhi sa Sugbo sugod niadtong July 15 ug mulungtad hangtud July 22 sa kasamtangang tuig.

Matud ni Jude Dave Milag, Vice President for Non-academic sa CF-JPIA, adunay katorse ka mga tunghaan nga miyembro sa  maong organisasyon apan karong tuiga, dose lamang kanila ang miapil sa maong kompetisyon.

Ang katorse ka mga tunghaan nga miyembro sa CF-JPIA naglangkob sa ACLC, BC, CIT-U, CRMC, LOC, STC, SWU, UC-BANILAD, UC-LM, UC-MAIN, USC, USJR,USPF ug UV.

Usa lamang kini sa highlights sa usa ka semana nga kasaulugan sa mga estudyante sa Accounting sa Sugbo.

Ang maong kalihukan matag tuig nang gipahigayun sa CF-JPIA. "Avant Garde" maoy nahimong tema sa pageant karong tuiga.

Nagpakita kini  sa linahi, dili common ug "out of this world" nga mga mugna sa matag kandidatu ug kandidata.

Ang coronation night niini mahitabo sa alas dos sa hapon karong Sabado, July 22 sa University of Southern Philippines Foundation. (BANAT NEWS)