Kasinatiang nipagawas sa iyang talento
Jaypee Lao (Banat) - July 6, 2017 - 4:00pm

Name: Efren Goles Tarongoy

Nickname : Fren/ Efren

Age: 61

Date of Birth: June 18, 1956

Place of Birth: Moalboal, Cebu

Favorite Singers: Jaime Salazar and Karen Carpenters

Favorite Songs: Buta, Kausa Nabasa ang Tubig, Ako Kini Higala, Mona Liza, Make Believe and People

Tuig 1988 ug 1989 sa dihang nasinati ni Efren Tarongoy ang malakip sa mga finalist sa Cebu Pop Music Festival.

Alang kaniya dako kadtung kahigayunan nga malakip sa maong tinamod nga songwriting competition sa pagpalambo pa sa iyang talento sa pagtagik og mga awit ug tungod niadto hinay-hinay siyang gihatud sa kapalaran sa mga lugar nga haum alang kaniya isip usa ka kompositor.

Ang mga awit nga naghatud kaniya sa maong kompetisyon sa managsunod nga tuig mao ang Bulawanong Tambag sa tuig 1988 ug pagka 1989 duha ka kanta nga iyang gisumitir ang nalakip sa finals, ug mao kini ang Hagki ang Kasakit Hilaki ang Kalipay nga gi-interpret ni Visayas Vergara ug Damgo sa Kaugmaon nga giawit ni Amie Felomino.

Siya ra sab ang nahimong lyricist  sa maong mga awit. Samtang gilab-as ni Efren ang  iyang kagahapon, diin usa ka dakong krisis ang nahiaguman niya kaniadto sa iyang kinabuhi. Krisis sa kawad-on nga matud pa tungod sa pagpaningkamot aron makalabang lang sa maong kahimtang, hapit na siya mapildi patighug sa mga kamot sa mga dautan.

Tungod matud pa sa pagpasipala sa mga tawong nipahimus sa kalisud niya kaniadto, miturok sa iyang alimpatakan ang pagpanimalos. Planong pagpanimalos nga maayo na lang napugngan sa mensahe sa Ginoo.

Sa maong higayon, nakat-on siya sa pagpasaylo ug niadtong  tungura nahimo niya ang pag-compose og labing unang awit.

Kasinatian nga nagtukmod kaniya sa pagpagawas og linahi ug tinaguan niyang talento.

Ang Bulawanong Tambag maoy labing una niyang komposisyon ug labing una sab niyang gisumiter sa Cebu Pop ug milusot kini isip finalist sa tuig 1988.

Ug sukad niadto, nagsunod sunod na ang mga composition nga iyang gipanghimo.

Gani matud pa naka-produce na sab siya’g pipila ka mga album nga iyang nabaligya sa mga nagkadaiyang recording outlets.

May panahon kaniadto nga nisaka ang kita niya dinhi apan nahunong lang kini sukad nanggawas na ang pirated copies.

Pagpanghambog usab ni Efren, pipila sa mga hinimo niyang kanta napiling tema sa mga nagkadaiyang drama sa radyo ug uban niini nahimo usab nga theme song sa nangagi nga mga serye sa  ABS-CBN Cebu , kini sama sa  Siya ug Ako sa Kangitngit, Cynthia ang Pinili, ug Bunga sa Kabangis ug Pagluib.

Kining tanan, naangkon niya tungod sa pait niyang kasinatian sa kagahapon.

Dungan sa iyang pagpanlimbasug ug pagpamatuod nga kitang tanan makalingkawas ra sa sitwasyon nga di nato gustong puy-an labi na kon kini magdalag dakong kadaut sa atong pagkatawo.

Tambag ni Efren sa aspiring composers nga magpadayon lang gyud og himo'g mga kanta labi na kadtong mga awit nga mohaum gyud sa pang-adlaw-adlaw nga mga kasinatian sa mga Sugbuanon.

Mga awit nga dili lang makahatag og kalingawan sa mga Cebuano kundi makahatud sab og inspirasyon sa kinabag-an.

Apan sukwahi sa kadaghanang kompositor nga gusto og awaaw nga dapit arun makamugna og mga nagkadaiyang awit, mas daghang ma-compose si Efren kon mag atubang siya sa mga maanindot nga mga mang-aawit sanglit matud niya mao man kini ang maghatag niya'g inspirasyon sa pagtagik og mga awit.

Sa panahong makadungog siyag mga 'amazing live performances' dali ra gyud siyang makamugna og kanta.

Dugang pagpaambit niya, kining tanan niyang talento, naangkon niya pinaagi sa grasya sa Kahitas-an nga iyang gisuklian pinaagi sa paggahin niya og igong oras sa aspetong relihiyon.

Nakahimo na siyag mga kanta alang sa religious gatherings ug mga awit sa misa .

Alang kaniya, iya gyud nga ipatigbabaw ang iyang pagserbisyo sa Ginoo kanunay.

Q and A

BNH:  Unsa ang labing dakong hagit nga imong nasugatan sa imong pagka-composer?

Efren: Mao kini ang hagit sa kon unsaun nako pagbali sa mga utok sa kadaghanang Pilipino labi na sa mga Sugbuanon sa paghigugma sa atung kaugalingong pinulungan kaysa anang foreign music  nga dili gyud atua. Kinahanglan tang mag-develop sa atong kaugalingong kultura kaysa magsunod-sunod sa laing kultura sa managlahing nasud.

BNH: Kon mahatagan ka og higayon nga mogama og kanta alang sa sikat nga mga singer, kinsa imong pilion ug unsa nga matang sa awit ang ipakanta nimo kaniya?

Efren: Akong pilion ang singer nga dunay timbre sa tingog ug kini mao si Nonoy Zuniga. Ug ang klaseng kanta nga akong ipaawit kaniya mao ang usa ka awit nga binisaya nga ballad. Usa ka binisayang version sa Mona Liza ug paga-uluhan kini nako'g Maria Klara.

BNH: Nganong nahigugma ka sa musika?

Efren: Daan na kong mahiligon sa mga balak sukad sa gamay pa. Dakong hagit ug kalingawan alang kanako nga mabuhatan og tuno ang mga titik ug mga pulong nga magsamoksamok sa akong hunahuna. Pinakadakong kalipay akong bation kon mahataga'g kinabuhi ang akong composition sa usa ka maayong mang-aawit. Samot na kon makadaug sa contest. (BANAT NEWS)

Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with