Giving up is not his Game

CEBU, Philippines - “Sa matag higayon nga motungtong ko sa entablado ug mokanta ko sa akong piyesa, gusto ko nga mobarog ko sa ilang atubangan ug ipakita sa kadaghanan nga ako kadto ang ilang giyagayagaan sa una ug ani-a na sa atubangan nga naningkamot og abot sa akong mga damgo”, ang puno sa paglaum nga pamulong sa 21- anyos nga batan-on nga si Kevin Roises Tecson kinsa nakasinati og pagtamay sa mga tawo gikan sa iyang palibot.

Paghatag og inspirasyon ngadto sa kadaghanan ang kanunay nga ibutang sa kinauyukang bahin sa alimpatakan ug kasingkasing ni Kevin gumikan kay gihimug-atan niya nga tuldukan na ang kagul-anan nga mabati sa usa ka tawo kun makadawat og mga pagtamay gikan sa uban.

Giasoy ni Kevin nga sa pangidaron nga 6 anyos, wala'y nagtudlo niya kun unsaon ang sakto nga pamaagi sa pagkanta. Ang nakahatag og interes niya mao ang videoke machine sa ilang silingan. Mao kini ang iyang gigamit aron mahimong tulay sa pagbansay-bansay sa iyang gustong ipabuhagay nga talento.

Gani, sama sa uban, gihagit niya ang iyang kaugalingon nga mosalmot og mga amateur singing contest aron masuta kun mabuhat niya ang mabuhat usab sa uban. Matud pa niya nga kulbahinam kadtong tungura gumikan kay wala siya maanad nga palibutan og daghang tawo nga motan-aw kaniya samtang nagkanta.

Malipayon siya nga sa dihang nalakip siya sa Sinulog Idol karong tuiga, nakita ug nabatyagan niya ang suporta gikan niini. Gisaysay niya nga mao na gyud kini ang hugna aron mapakita niya sa iyang pamilya kun unsa ang iyang mga kasikas gawas sa pagtungha. Tumang kalipay ang iyang gibati sa dihang nahatagan na gyud siya og kahigayonan  nga mamahimong finalist karong tuiga sa Sinulog Idol. Dili lang sa makausa nga higayon nga misuway siya og audition sa maong kompetisyon. Dili na niya maihap kun ikapila na tungod kay matag tuig gyud siya nga mopatim-aw sa audition sa Sinulog Idol.

“Akong gustong pamatud-an nga bisan kapila madagma, mobangon gihapon. Bisan og kapila nga na-reject, kinahanglan dili gyud mo-surrender kay ang tanan adunay panahon ug dapat maghuwat usab sa imong panahon nga ihatag sa Ginoo alang kanimo”, suma pa ni Kevin.

FastFacts

Name: Kevin Roises B. Tecson

Nickname: Kev

Birthday: February 10, 1996

Address: Basak Pardo, Cebu City

School & Course:  University of San Jose – Recoletos / Associate in Tourism

Hobbies:  Playing badminton, swimming, surfing on internet

Favorite Delicacy: Piyaya

Height: 5’8

Weight: 70kgs

Celebrity Crush: Angel Locsin

Favorite Color: Blue

Favorite Song:  Maghintay Ka Lamang

Favorite Singer/s: Sarah Geronimo, Christian Bautista, Martin Nievera

Favorite Movie: Titanic

Favorite Artist: Anne Curtis

Motto: Timing is everything. If it's meant to happen it will at the right time for the right reasons and also never give up.

Titles/Achievements in Life:

-Pacific Idol 2013 Top 10

-Campus Idol 2015 Top 10

-Voice Quest Top 10

-Tawag ng Tanghalan Contender

Q and A

BNH: Unsaon paghulagway ang usa ka Kevin Roises?

KEVIN: Way libog. Happy-go-lucky person. Moody usahay. God-fearing and mother’s boy.

BNH: Unsa ang imong adbokasiya?

KEVIN: Ang akong advocacy sa akong kinabuhi is to inspire the young ones nga dili mo surrender sa pagpangandoy kay matod pa nila nga libre ra mangandoy. Ug dili gani madawat sa audition basin, dili pa jud para imoha. There’s always a right time for everything ug dili sad wagtangon ang pag-ampo.

BNH: Unsa ang di nimo malimtan nga estilo sa pagkanta?

KEVIN: Naihas ko anang kurog-kurog nga apil sa tingog haha. Nalingaw ko og discover unsaon siya pagkat-on mao to ako siya gi-apply.

BNH:  Unsa ang proudest moment sa imong kinabuhi?

KEVIN: Katong nakatungtong ko sa It’s Showtime stage. Pangandoy jud nako mo-represent sa Visayas. Dayun sa Sinulog Idol as in for the past years na sige ko og audition sobra ko ka proud kaayo kay wala jud ko ni give-up until such time nga nahimo nakong contestant niini as in maka-proud gyud.

BNH: Unsa ang imong ubang damgo sa kinabuhi?

KEVIN: Ganahan ko mag-flight attendant puhon. Bata pa-lang ko ganahan nako mahimong usa ka flight steward. Aside from singing mao na akong pangandoy.

BNH: Kinsa ang singer nga gusto nimo maka-duet puhon?

KEVIN: Ang akong pinaka idol sukad pa pagbata nako kay si Sarah Geronimo gyud,  idol  kaayo nako siya kaniadto pa, sa dihang niapil pa lang siya sa usa  ka reality show sa usa ka estasyon ug usa pud siya sa akong inspirasyon sa akong pagkanta. Total performer jud siya mao na nga idol kaayo nako siya.

BNH: Unsa ang imong future plans?

KEVIN: Padayun gihapon sa pagkanta ug humanon nako akong pagskwela kay kun maka-graduate man puhon, mangita ko og trabaho pero ang pagkanta naa gihapon kay naa baya gihapon na nimo,  di baya na mawagtang ang pagkahilig sa pagkanta.

BNH: Unsa ang imong feeling nga naapil ka isip finalist sa Sinulog Idol?

KEVIN: As in lipay kaayo ko! Nagbunga na jud intawn ang akong pagpaningkamot. Mura ko og nakadaog og lotto. Hahaha

BNH: Unsa ang imong mensahe sa tanang mga tawo nga misalig nimo sa imong pag-apil sa Sinulog Idol?

KEVIN: Daghan kaayong salamat sa paghatag ninyo og suporta,  nindot kaayo sa feelings nga makakita ka’g tawo nga na-inspire diay nimo tungod ra sa pagkanta. Daghan kaayong salamat ilabi  na sa akong mama ug papa nga nitan-aw gyud.

BNH: Unsa ang imong memorable experience sa pag apil sa Sinulog Idol?

KEVIN: Akong nakuha sa pag-apil nako sa Sinulog Idol is to value what you have kay dili tanan natagaan og moment. Ang friendship namo sa co-idols kay dili jud kaayo mabayran ug sa mga nakauban namo behind the scenes, sila ang naghimo namo aron mahimong  better performer.