Taekwondo jin misakmit og surprising Asiad gold medal alang sa Pilipinas

CEBU, Philippines — Ikaupat nga gold medal alang sa Pilipinas.

Ang Pinoy jin nga si Jeus Gabriel Derick Yape nanghawod sa mixed individual virtual taekwondo competition kagahapong adlawa sa Toyohashi Gymnasium didto sa Japan alang sa usa ka surprisang gold medal alang sa nasud.

Si Yape mipildi ni Ngoc Tuyet Sang Chau sa Vietnam, 2-0, sa final.

Ang 22-anyos nga si Yape aduna na karoy duha ka medalya sa Asia human siya naka-bronze sa men’s individual poomsae.

Sa boxing, si Carlo Paalam nakabira lamang og silver medal human siya nahagba sa mga kamot sa Hapon nga si Rui Yamaguchi sa men’s 55 kilogram final sa Nishio Gymnasium.

Si Paalam gibuntog sa pambato sa Japan pinaagi sa split decision.

Tulo ka judges ang mi-iskor og 29-28 pabor ni Yamaguchi, samtang ang laing duha mitali og 30-27 ug 29-28 alang ni Paalam hinungdan sa nabahin nga desisyon.

Si Paalam wala makabuak sa 16 ka tuig nga huwaw sa bulawang medalya sa Pilipinas sa Asiad boxing. Ang katapusang Pinoyng boksidor nga naka-gold mao si Rey Saludar niadtong 2010 Asiad didto sa Guangzhou, China.

Sa laing bahin, si Kaila Napolis naka-bronze sa women’s -52 kilogram category sa jiu-jitsu samtang sila si Khy Progella ug Sofiah Pagara naka-bronze sab sa beach volleyball.

Ang Pilipinas sa kasamtangan nagbarog sa ika-16 nga dapit sa standings uban ang upat ka gold, unom ka silver ug 16 ka bronze medals.