EASL 2026-27 season mosikad na sa SM Seaside Arena

CEBU, Philippines — Ang giatngan nga East Asia Super League (EASL) 2026-27 season moarangkada na uban ang makasaysayanong doubleheader karong adlawa (Sabado, Oktubre 3) sa SM Seaside Cebu Arena.

Mao kini ang labing unang propesyonal basketball games nga giduwa sa maanindot nga pasilidad nga gibalihan sa publiko niadto lamang Hulyo.

Ang Macau Hau Chon ug Abra Weavers sa Pilipinas, duha sa lima ka teams nga mo-debut sa EASL, mopakita og aksiyon sa pasiunang mga duwa.

Mag-abot sa alas-4 sa hapon ang Macau ug Taiwan Fubon Braves, samtang ang Weavers makigharong sa Hong Kong Eastern sa alas-7 sa gabii. Ang Goyang Sono Skygunners, TSG GhostHawks ug Nagasaki Velca mao ang laing tulo ka teams nga mokumbati sa liga sa unang higayon.

Nanghinaut ang Weavers nga dad-on ang kalamposan nga ilang natagamtaman sa Maharlika Pilipinas Basketball League (MPBL) ngadto sa rehiyonal nga kompetisyon.

Human sa Eastern, nag-atang sa ilang dalan sa Group C ang Ryukyu Golden Kings sa Japan ug ang Taoyuan Pauian Pilots sa Chinese Taipei. Moduwa sa ilang tugkaran atubangan sa ilang mga fans, ang Weavers malaumon nga makatabang kini sa ilang kampanya alang sa madaogon nga sinugdanan.