UV Green Lancers mikadlit sa ikalimang sagunson nga daog

CEBU, Philippines —  Ang four-time defending champions University of the Visayas (UV) Green Lancers mitumba sa University of Southern Philippines Foundation (USPF) Panthers, 70-63, alang sa ikalima nilang sagunson nga daog sa Cebu Schools Athletic Foundation, Inc. (CESAFI) Season 26 basketball tournament niadtong Martes sa gabii, Septiyembre 29, sa Cebu Coliseum.

Ang tanan gawas sa usa sa 15 ka players nga gipasud ni coach Gary Cortes naka-iskor sa balanse kaayong opensiba sa Lancers, nga nakigsawo na karon sa liderato sa college division uban sa University of San Carlos (USC) Warriors bitbit ang managsamang 5-1 rekords.

Si Rovello Robles mihipos og 10 puntos, duha ka rebounds ug usa ka assists alang sa mga Visayanians, nga miabante og 24 puntos human sa eksplosibo nilang 31-13 nga sinugdanan.

Si Christian Helson Illut miposte og double-double nga 11 puntos ug 10 ka rebounds uban ang usa ka assist ug duha ka steals, samtang si Ashly Howard Dennison mitali og 10 puntos, siyam ka rebounds, tulo kaassists, duha ka steals ug usa ka block apan nangahoyhoy ang ilang abaga kay ang Panthers misukarap sa

1-6.

Sa juniors division, ang San Roque College de Cebu (SRCDC) Greyhounds mipayaka sa Don Bosco Technical College (DBTC) Greywolves, 83-79, aron putlon ang tulo ka sunod-sunod nilang pildi.

Upat ka players sa SRCDC ang mikadlit og double figures, nga gipangulohan ni Vonn Peter Zamora uban ang 15 puntos,  lima ka rebounds, usa ka assist, usa ka steal ug usa ka block.

Dako sab og natampo si John Raven Dumanhug uban ang 14 puntos, tulo ka rebounds, duha ka assists ug duha ka steals ingon man sila si Jello Oñot ug Bert Nathan Curimao nga parehong mirehistro og double-double.

Si Oñot mipupo og 12 puntos, 12 ka rebounds, usa ka assist ug usa ka block, samtang si Curimao milansang sab og 12 puntos uban ang 10 ka rebounds ug usa ka assist alang sa Greyhounds, nga nagtangag na karon og 2-3 nga baraha.

Nangu si Don Bosco si Zane Oddyssie Ondoy uban ang double-double nga 27 puntos ug 13 ka rebounds.

Si Antonio Joseph Issifu mibirada og 19 puntos, unom ka rebounds, pito ka steals ug usa ka assist, samtang si Mychael Bourge Suico mitimbre og 11 puntos ug 10 ka rebounds apan nakawang ang maanindot nilang salida kay ang Greywolves nagpabiling way daog sa lima ka duwa.