Paalam mitagak sa Kazakh world champion, moaway alang sa Asian Games boxing gold

CEBU, Philippines —  Ang Pinoyng boksidor nga si Carlo Paalam mibuhi sa iyang paglaum nga mosakmit og bulawang medalya human miposte og 3-2 split decision nga kadaogan batok ni Makhmud Sabyrkhan sa Kazakhstan sa kulbahinam ug dugoon nilang men's 55kg semifinal bout sa 20th Asian Games Aichi-Nagoya 2026 kagahapong adlawa didto sa Nishio Gymnasium sa Japan.

Tungod niini, ang 2020 Tokyo Olympics silver medalist migarantiya sa Pilipinas og silver medal sa prestihiyosong torneyo nga mahitabo kausa lamang sud sa upat ka tuig.

Dugang niini, gipamatud-an ni Paalam nga dili tsamba ang miagi niyang daog batok ni Sabyrkhan.

Sa una nilang engkwentro upat ka tuig na ang milabay, si Paalam mipildi ni Sabyrkhan pinaagi sa 4 -1 nga split decision sa bantamweight finalsa 2022 ASBC Asian Elite Boxing Championships didto sa Amman, Jordan aron labnihon ang gold. Karon, ang 28-anyos nga si Paalam nagtirada sa unang Asiad boxing gold sa nasud sud sa 16 ka tuig. Ang katapusang Pinoy nga nakadaog og bulawan sa Asian Games mao si Rey Saludar niadto 2010 Guangzhou Games sa China.

Nagbarog sa dalan ni Paalam mao ang pambato sa Japan nga si Rui Yamaguchi, nga miabante sa final round human gipalagpot ang Mongolian nga si Bilguunsaikhan Kharkhuu pinaagi sa unanimous decision. Mabangga sila alang sa gold karong Biyernes, Oktubre 2.

Sa laing bahin, ang bitoon sa tennis nga si Alex Eala midominar ni Joanna Garland sa Chinese Taipei, 7-5, 6-0 aron pagmartsa ngadto sa women's singles semifinals.

Sa women's beach volleyball, sila si Khylem Harl Progella ug Sofiah Shanine Pagara mitikang sab sa semis human gipatikangkang ang mga Hapon nga sila si Non Matsumoto ug Ran Matsumoto, 2-0 (24-20, 22- 20).