UV alumnus misabwag sa iyang gasa pinaagi sa sports

CEBU, Philippines — Usa ka malumo og kasingkasing nga University of the Visayas (UV) alumnus ang mihatag og balik sa pinangga niyang tunghaan isip timaan sa iyang pagkamapasalamaton.

Si Engr. Apollo “Cocoy” Enriquez mibalik sa institusyon nga nakatabang sa paghulma sa iyang pagkatawo karon aron mohatag og mga sapatos, tualya, ug jersey alang sa praktis ngadto sa varsity players sa UV volleyball team nga mopakita'g aksiyon sa Cebu Schools Athletic Foundation, Inc. (CESAFI) Season 26.

Nisaad sab siya og usa ka sako nga bugas matag bulan alang sa team.

Mitambong sa simple apan mahinungdanong seremonyas sa turnover niadtong Martes sa gabii, Agosto 25, sila UV Executive Board Treasurer Dr. Leopold Gullas Lucero, UV Alumni Association, Inc. President Engr. Zaldy Casinillo, UVAAI Press Information Officer Dee J.P. Villanueva, UV Cultural and Athletic Director Dr. Chris Mejarito, ug ang volleyball coaching staff nga gipangulohan ni Rafael “Raffy” Briones.

“Thank you for giving me this chance to share the blessings that I have from above to our school. It's also like giving back for me," matud pa ni Enriquez, nga migradwar nga Magna Cum Laude sa Civil Engineering sa UV.

Pinaagi sa scholarship grant gikan sa gobyerno sa Denmark, si Enriquez mikulit og kasaysayan isip labing unang produkto sa UV nga nadawat sa Asian Institute of Technology (AIT) sa Bangkok, Thailand.

Sa edad nga 21 anyos, nagtudlo na si Enriquez og review classes ug kaduha siyang gipasidunggan nga Most Outstanding Instructor sa Engineering Department. Na-promote siyang Associate Dean sa wala pa mahimong pinakabatang Dean sa edad nga 30.

Human sa iyang pagserbisyo sa UV, gitudlo si Enriquez isip Examiner sa wala pa mahimong Chairman sa Board of Civil Engineering ubos sa Professional Regulation Commission (PRC) sa edad nga 44. Siya ang pinakabata nga nakalingkod sa maong posisyon.

Sa pagtikang niya og balik sa hawanan sa UV, si Enriquez nanghinaut nga makahatag og inspirasyon sa mga Visayanian nga estudyanteng atleta sa pagkab-ot sa ilang mga pangandoy sa kinabuhi ug sa samang higayon makahatag og dungog sa nibersidad pinaagi sa ilang talento sa sports.

“Hope this will encourage you, motivate you that the school is here, the alumni are here," dason pa ni Enriquez. "Paninguha mo na makahatag mo'g name sa university. Make us proud."