Ian Abne wa mahadlok sa Chinese ko artist

CEBU, Philippines — Ang way pilding pambato sa ARQ Stable nga si Ian Paul "Assassin" Abne masaligon kaayo sa hugtanon niyang training ug makuti nga preparasyon nga wala siya hahadlok ni Chinese knockout artist Dianxing Zhu, nga nanganti nga pakamangon siya sa giatngan nilang sangka usa ka semana gikan karon.

Si Abne (12-0, 4KOs) makigbinukbokay ni Zhu (16-1, 14KOs) sa usa ka International Boxing Federation (IBF) minimumweight title eliminator nga maoy main event sa "Fist of Fury X" sa Chao Sy International Promotions karong Mayo 9 sa Cebu Coliseum.

Ang modaog sa 12 ka hugna nilang rambol makaangkon og katungod nga mohagit ni IBF minimumweight champion Pedro Taduran (20-4-1, 14KOs).

Sa sayo pa, si Zhu nanganti nga iyang patikangkangon si Abne.

Ang prediksyon ni Zhu gipalanog sab sa iyang trainer ug manedyir nga si Robin Wong.

“I believe, barring any surprises, Zhu Dianxing will finish his opponent by knockout, no matter what fighting style the opponent uses,” matud pa ni Wong.

Apan si Abne mipahimangno nga si Zhu angayan magmatngon kay basin kaonon ra niini ang iyang mga gipanulti.

"Grabi kaayo ang training namo everyday para maka kumbati mi og maayo sa Chinese," padayag pa sa 26-anyos nga si Abne. "Segurado nga malingaw ang mga boxing fans kay sukmagay gyud ni."

"Sa gibahad sa akong kontra nga iya kung tumbahon, akong masulti nga kining dulaa paunhanay ra gyud mi ani. Kay og ako pud makabinta niya, dili sad ko magduha-duha og bunal niya," dugang pa ni Abne.

Mao sab ang gihunahuna sa coach ni Abne nga si Fernando Ocon.

"Ipaseguro lang niya (Zhu) og knockout kay og dili gani niya matinood iyang estorya, kami gyud ang motiwas sa iyang bahad ni Abne," deklara pa ni Ocon.

Sa dili pa magbangga sila si Abne ug Zhu, duha ka mga batos sa Chao Sy Stable ang moaway alang sa kampiyonayo.

Si Jimuel Arañas (8-3-1, 4KOs) makigharong ni Jeric Noynay (5-2, 1KO) sa Martinez Stable alang sa World Boxing Federation (WBF) Silver flyweight title samtang si John Paul "Angas ng Cebu" Gabunilas (10-4, 7KOs) makigbugno ni Ramil Roda (7-3-2, 4KOs) sa Omega Gym alang sa Philippine Boxing Federation (PBF) super flyweight belt.

Ang mga tickets sa kulbahinam nga promosyon nagkantidad og P100 sa general admission, P300 sa upper box, P500 sa lower box, ug P1,000 sa ringside.