Dream big, bigasan hub nanghawod sa G Hoops

CEBU, Philippines — Ang Dream Big Basketball sa Ormoc City ug ang Bigasan Hub x CKBA sa Consolacion, Cebu parehong mipakyaw og daog sa duha nila ka mga duwa sa semifinals aron paglugwa nha kampiyon sa labing unang Visayas G Hoops nga gipaluyohan sa VISTECH didto sa Sacred Heart School-Jesuit old campus sa General Maxilom Avenue, dakbayban sa Sugbo ning bag-ohay pa lamang.

Si Emmanuel Fortuna Jr. mitali og 16 puntos aron aswaton ang Dream Big ngadto sa kulbahinam nga daog, 53-50, batok sa RJN sa siyudad sa Talisay.

Human niini, si John Roldan Perez mikadlit og 18 puntos sa dihang gipayaka sa Dream Big ang CIT-U Baby Wildcats, 54-48. Mao kini tanan ang gikinahanglan sa bisitang Ormocanons aron sakmiton ang korona sa 13 Under division.

Ang RJN mipahiluna sa ikatulong puwesto human gilampaso ang Wildcats, 50-17, ubos sa pagpangu ni John Peter Sabido nga mihipos og 12 puntos.

Sa laing bahin, sila si Kennie Jie Lugatiman ug Charlie Daniel parehong mipostre og 12 puntos sa dihang ang Bigasan Hub x CKBA milampornas sa Abellana Chiefs, 79-57, ug sa The Realtors, 90-77, aron langkaton ang titulo sa Under 15 category. Ang Realtors, nga gigatongan og 21 puntos gikan ni Raphy Pasaje, miangkon sa tropeyo alang sa ikatulong dapit human gibugha ang Abellana Chiefs, 82-67.  Sa kinatibuk-an, 24 ka teams ang mipakita'g aksiyon sa malampusong unang edisyon ning grassroots nga liga nga gipasiugdahan nilang coach Rocky Alcoseba, SBP official Rey Cañete ug Australia-based league organizer Van Halen Parmis.