Suns mi-trade ni Durant sa Rockets

CEBU, Philippines — Si two-time NBA champion Kevin Durant gi-trade sa Phoenix Suns ngadto sa Houston Rockets alang sa walo ka players sa makapakugang nga transaksiyon nga gikompirma niya kagahapong adlawa.

Ang pagbinayloay og players mohatud sa 36-anyos nga Amerikanong All-Star forward ngadto sa Houston hulip nilang Fil-Am Jalen Green ug Dillon Brooks ingon man ang 10th pick sa Rockets sa 2025 NBA Draft karong Huybes ug lima ka second-round picks sa umaabot.

Si Durant, ang 2014 NBA MVP nga kaupat nakampiyon sa Olympics uban sa Team USA, motapon sa Rockets ubos sa paggiya ni coach Ime Udoka nga mitapos uban ang 52-30 rekord, nga maoy ikaduhang labing nindot sa Western Conference sunod sa Oklahoma City Thunder.

Samtang ang Suns mao ang dunay labing taas nga payroll sa kasaysayan sa NBA apan mitapos lamang sa ika-11 nga puwesto sa West bitbit ang 36-46 nga           baraha.

Kini bisan pa man sa impresibong average ni Durant nga 26.6 puntos, 6.0 rebounds, 4.2 assists ug 1.2 blocks matag duwa.

Sa Rockets, si Durant makig-alyansa nilang Turkish big man Alperen Sengun ug Fred VanVleet. Duna sab silay maayong relasyon ni Udoka nga iyang nakatrabaho uban sa Brooklyn Nets ug US team.

Si Durant, nga nalandig sa Suns human gi-trade sa Nets niadtong 2023, mao ang No.2 overall pick sa 2007 NBA Draft sa Seattle SuperSonics, nga mibalhin sa Oklahoma City niadtong 2008.

Nahimong NBA scoring champion upat ka higayon uban sa Thunder, nakaabot sila sa NBA Finals niadtong 2012 apan gipilde sa Miami Heat nga gipangulohan ni LeBron James. Gibayaw siyang season MVP niadtong 2014 apan ang Thunder gipayaka sa San Antonio Spurs sa Western Conference finals.

Niadtong 2016, ang Thunder misukarap human nakalabaw  og 3-1 sa serye ug gilupig sa Golden State Warriors sa West finals.

Human ang Golden State gipaluhod sa Cleveland sa 2016 NBA Finals, si Durant mipirma og duha ka tuig nga kontrata uban sa Warriors diin ilang gibuntog ang Cavaliers sa 2017 ug 2018 finals.