Thunder, Pacers magtiwas sa Game 7 sa NBA Finals

CEBU, Philippines — Kinsay koronahang kampiyon sa 2024-2025 NBA season?

Masayran na kini karong adlawa (Lunes, Hunyo 23 oras dinhi sa Pilipinas) sa dihang ang Oklahoma City Thunder ug ang Indiana Pacers magtiwas sa katapusang higayon sa Game 7 sa NBA Finals didto sa Paycom Center sa OKC.

Bitbit ang managsamang 3-3 nga baraha, magsugod ang tinagakay nga duwa sa alas-8 sa buntag.

Ang Pacers nakaangkon pa og laing kinabuhi human gilampaso ang Thunder, 108-91, sa Game 6 niadtong Biyernes didto sa ilang korte.

Ang duha ka kampo parehong nasayud sa kamahinungdanon sa ilang sangka kay mao man kini ang utlanan sa ilang kahago, paningkamot ug sakripisyo ning season.

"We've got one game," matud pa sa bitoon sa Pacers nga si Tyrese Haliburton. "One game. Nothing that has happened before matters and nothing that's going to happen after matters. It's all about that one game."

Nahibawo sab niini ang Thunder.

"One game for everything you ever dreamed of," dason pa ni Shai Gilgeous-Alexander, ang alas sa Thunder nga naglaraw nga mamahimong unang player sukad ni Stephen Curry sa Golden State Warriors niadtong 2015 nga midaog sa MVP award ug NBA title sa susamang season. "If you win it, you get everything. If you lose it, you get nothing. It's that simple."

Nagpabilin hinoong paborito ang Thunder ilabi na kay ang home teams nagkupot og 15-4 rekord sa mga Game 7 sa NBA Finals.

Ang miaging Game 7 sa usa ka championship series nahitabo niadto pang 2016 diin si LeBron James ug ang Cleveland Cavaliers mipakugang sa Warriors didto Oakland.

Mahimo kining gamiton nga inspirasyon sa Pacers, nga nagtinguha molangkat sa labing una nilang korona sukad sila miapil sa NBA niadtong 1976.

Samtang ang Thunder naghandum nga mosakmit sa unang kampiyonato sa ilang prangkisa sukad sa kontrobesiyal nilang pagbalhin sa Oklahoma City niadtong 2008. Nakabira na sila og korona niadtong 1979 sa dihang nagdala pa sila sa pangan nga Seattle SuperSonics.