Populasyon sa mga iho sa Pilipinas nikunhod — BFAR

CEBU, Philippines — Ang Bureau of Fisheries and Aquatic Resources (BFAR) nilusad sa nasudnong plano nga mogiya sa pagkonserba ug sa malungtarong pagdumala sa mga iho, pagi ug chimaera kini gumikan sa makaalarma nga pagkunhod sa populasyon sa iho sa Pilipinas.

Ang BFAR nagkanayon nga ang Pilipinas maoy pinoy-anan sa dul-an 200 ka species sa mga iho, pagi ug chimaera lakip ang mga iconic species sama sa whale shark ug endangered pelagic thresher ug devil ray.

Sa maong 200 ka species, 30 ang gikonsidera nga vulnerable, 20 ang endangered ug duha ang gi-classify nga critically endangered ubos sa International Union for Conservation of Nature (IUC) Red List gumikan sa overfishing, by catch, pagkawala sa puy-anan, climate change ug unregulated trade.

Samtang 58 ka species sa iho, pagi ug chimaera ang gipanalipdan ubos sa Convention on International Trade in Endangered Species of Wild Fauna and Flora (CITES) daghan gihapon ang nagpabiling walay legal nga mga panalipod.

Niadtong buwan sa Mayo niining tuiga adunay kamandoan nga giluwatan nga nagtugot sa central ug regional nga mga buhatan sa BFAR sa pagpatuman sa mga koordinasyon nga mga aksyon ubos sa bag-ong gi-finalize nga "Shark, Ray, ug Chimaera Conservation and Fisheries Management Framework".

Ang kasamtangang balaod nagtutok sa lima ka importanteng pillar nga gilangkuban sa research ug development, conservation ug adaptive management, monitoring ug enforcement, capacity-building, ug socio-economic safeguards.

Pinaagi niini, ang BFAR naglaom nga mokolekta og mas maayong catch data, maprotektahan ang mga key habitat, paghimo og recovery plans, pagbansay sa mga personahe, mosuporta sa mga lokal nga kagamhanan, ug maghimo og livelihood programs alang sa komunidad sa mga mananagat.

Karong tuiga, ilusad sa BFAR ang usa ka nasudnong kampaniya sa edukasyon sa pakigtambayayong sa mga grupo sama sa Marine Wildlife Watch of the Philippines (MWWP) nga magpahigayon og mga kalihokan sa eskwelahan ug mga materiyal sa lokal nga pinulongan nga naghisgot sa dagkong mga kalihokan sama sa Fish Conservation Week. BDB BANAT NEWS