Batch 2004 wala gihapoy pilde sa SHAABAA Season 28

CEBU, Philippines — Ang '04 The Win Batch 2004 miinat sa way pilde nilang ratsada ngadto sa pito ka duwa pinaagi sa 90-50 nga demolisyon sa Magis Medical Fund sa Sacred Heart Ateneo Alumni Basketball Athletic Association (SHAABAA) Season 28 niadtong Miyerkules, Hunyo 18, didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.   

Si Clay Gumalo mibulsa og 20 puntos uban ang siyam ka rebounds samtang si Christopher Consunji midugang og 11 puntos, tulo ka rebounds, usa ka assist ug upat ka steala sa dihang ang Batch 2004 ni coach Gary Cortes mipahugot sa ilang pagkupot sa solong liderato sa Division B bitbit ang perpektong 7-0 rekord.

Ang Insular Square Batch 2005 nagpabilin sa ikaduhang dapit uban ang 6-1 nga baraha human gilampaso ang Golden Dragons Batch 2012, 76-43.

Si Daryle Tan maoy nangu sa Batch 2005 uban ang 19 puntos, pito ka rebounds ug lima ka steals. Nakakuha siya og dakong suporta gikan nilang Efren Sanchez Jr. ug Earl Locaylocay nga nagkumbinar og 22 puntos ug siyam ka rebounds.

Sa laing bahin, ang Onses Batch 2011 ug ZLREJ Trading and Construction Batch 2010 naggsawo karon sa ikatulo ug ikaupat nga puwesto uban ang managsamang 5-2 nga marka.

Si Karlo Sibi mipupo og 26 puntos, tulo ka rebounds, tulo ka assists ug duha ka steals samtang si Kiefer Lim midugang og double-double nga 15 puntos ug 10 ka rebounds uban ang lima ka assists ug upat ka steals aron agakon ang Batch 2011 ngadto sa 71-69 nga pagpiog sa Knox Steel Batch 2007.

Si Charles Divinagracia mirehistro og 21 puntos, tulo ka rebounds ug lima ka assists samtang si Jasper Diaz miharos og 20 puntos, 13 ka rebounds ug upat ka steals aron ituboy ang Batch 2010 ngadto sa 76-47 nga paglampornas sa 2K Core Pacific.

Sa laing duwa sa Division B, ang Harley Davidson Batch 2012 miduwa uban ang lima lamang ka players apan silang tanan milusad og eksplosibong opensiba nga miresulta ngadto sa 113-100 nga pagpayaka sa 2kcares.org.

Si  Alexter Dan Tecson maoy nangu sa Batch 2012 uban ang 37 puntos, pito ka rebounds ug tulo ka assists.

Wala sab magpabitin si Julius Cadavias nga mirehistro sa unang triple-double ning season uban ang 25 puntos, 18 ka rebounds ug 10 assists nga iyang gisukipan og tulo ka steals ug tulo ka blocks.

Si Aaron Baldwin Sing miamot og 18 puntos, 13 ka assists, tulo ka rebounds ug unom ka steals alang sa Batch 2012, si Simon Guanzon milansang og 18 puntos, upat ka rebounds, tulo ka assists ug duha ka  steals samtang si Kyle Dumon mihipos og 15 puntos, 12 ka rebounds ug pito ka assists.

Sa bugtong aksiyon sa Division C, sila si Jorine Cercado, Arc Araw-araw ug Rendell Senining nagkumboya'g 61 puntos, 14 ka rebounds ug 11 ka assists sa dihang gilampaso sa Nest Workspaces Batch 2013 ang BYD Batch 2020, 93-65, alang sa ikatulo nilang daog sa lima ka duwa.